Мерц Трампнинг Украина бўйича воситачилигини олқишлади

Германия канцлери Фридрих Мерц ва Украина президенти Володимир Зеленский АҚШ президенти Доналд Трампнинг тинчликка эришишга қаратилган воситачилик қадамларини олқишлади, деди Германия ҳукумати матбуот котиби Штефан Корнелиус икки етакчи ўртасидаги телефон суҳбати якунлари бўйича.

Корнелиуснинг сўзларига кўра, Мерц ва Зеленский АҚШ махсус вакили Стивен Уиткоффнинг Россия президенти Владимир Путин билан яқиндаги учрашувидан кейинги воқеаларни муҳокама қилган. Иккала сиёсатчи ҳам Россия халқаро ҳуқуққа зид бўлган тажовузкор урушни тўхтатиши кераклигини тасдиқлади.

Канцлер ва Украина президенти ўз ҳаракатларини европалик ҳамкорлар ва АҚШ билан яқиндан мувофиқлаштиришга келишиб олди. «Ушбу урушни тугатиш параметрлари Европанинг ўнлаб йиллардаги хавфсизлик тизимини белгилаб беради», — деб ёзди Зеленский ўзининг Telegram-каналида. У Украина Европанинг ажралмас қисми эканлигини, Европа давлатлари музокараларда иштирок этиши кераклигини таъкидлади.

Киевдан олинган маълумотларга кўра, Трамп аввало Путин билан шахсий учрашув ўтказишни, кейин эса Зеленский иштирокида музокараларни уч томонлама форматга кенгайтиришни режалаштирган. Аммо Кремл ҳозирча Россия ва Украина раҳбарларининг эҳтимолий учрашуви ҳақида аниқ баёнотлар беришдан ўзини тийиб турибди.