Қирғизистонда «Zakovat» бўйича Осиё очиқ чемпионати бошланди

2025 йил 16–17 август кунлари Қирғизистон пойтахти Бишкекда «Zakovat» интеллектуал ўйини бўйича III Осиё очиқ чемпионати ўтказилади. Ушбу йирик тадбирда Осиёнинг кучли жамоалари бир-бирлари билан беллашади.

«Zakovat» 24 йилдан буён дунё бўйлаб иштирокчиларга билим олиш ва ривожланишга илҳом бериб келмоқда. Дастлаб телекўрсатув сифатида намойиш этилган ушбу ўйин бугунги кунда жаҳоннинг турли мамлакатларида ўтказиладиган йирик интеллектуал ҳаракатга айланган. Ҳар йили минглаб иштирокчилар, шу жумладан, бир нечта халқаро жамоалар бу ўйинда иштирок этиб, ўз билимларини синаб кўради.

Ўтган йилларда «Zakovat» турнирлари АҚШ, Буюк Британия, Малайзия, Қозоғистон ва Тожикистонда ўтказилган. Шунингдек, Тошкентнинг ўзида сўнгги йилларда умумтаълим мактаблари, ўрта махсус ва профессионал таълим муассасалари, олий ўқув юртлари ҳамда ҳаваскор жамоалар ўртасида 29 мингдан ортиқ ўйин бўлиб ўтди.

Шу билан бирга, 2023 йилда Тошкентда 14 мамлакатдан 55 та жамоа иштирок этган I Осиё очиқ чемпионати ҳам муваффақиятли ўтказилди. Қозоғистонда бўлиб ўтган иккинчи турнир ҳам ўзининг юксак савияси ҳамда 14 давлатдан келган билимдонлар билан ажралиб турди.

Бишкекда ўтказилаётган «Zakovat»нинг навбатдаги III Осиё очиқ чемпионати нафақат илм-фан ва таълим соҳасидаги интеллектуал воқеа, балки мамлакатлар ўртасидаги дўстлик ва ҳамкорликни янада мустаҳкамлаш учун ажойиб имконият яратади. Чемпионатда қатнашувчи жамоалар жами 6 турда 72 та саволга жавоб топиш орқали ўз билим ва салоҳиятларини намоён қилади. Тадбир, ўз навбатида, нафақат билимни синовдан ўтказиш, балки янги авлодни билим олишга, ўзини ривожлантиришга интилишга ундашга қаратилганлиги билан ҳам муҳим аҳамият касб этмоқда.