Бишкекда “Zakovat” III Осиё очиқ чемпионати якунланди

Турнирда Ўзбекистон, Қозоғистон, Қирғизистон, Тожикистон ва Россиядан келган билимдонлар ўз билимларини синовдан ўтказишди.

Турнирнинг асосий баҳси — “Zakovat” ўйинида 6 та тур ўтказилди. Якунда чемпионлик Қозоғистоннинг “Интеллект-экипаж” жамоасига насиб қилиб, чемпионат кубоги ҳамда 100 миллион сўм пул мукофотига эга чиқишди.

Иккинчи ўринни ҳамда 60 миллион сўмни “ОНК” жамоаси ўз ҳисобига расмийлаштириб қўйди. Учинчи ўрин учун қўйилган 40 миллион сўмни эса “Элизабет Пэрриш” жамоаси “илиб кетди”.

Яна бир жамоавий баҳс “Brain ring” ўйинининг финал баҳсида Қозоғистонинг “ОНК” жамоаси ҳамда Ўзбекистондан иштирок этган “Мистерия” жамоаси чемпионлик учун куч синашишди. Якунда чемпионлик “ОНК”га, иккинчи ўрин эса ватандошларимизга насиб қилди. Иккита учинчи ўринни Қозоғистоннинг “Интеллект-экипаж” ва “Brain Art” жамоалари эгаллади.

Шунингдек, турнирнинг “Шахсий ўйин” яккалик баҳсларида “энг кучли билимдон” унвонига россиялик Серафим Шибанов сазовор бўлди. Иккинчи ўринини Азат Тургунов ва учинчи ўринни Денис Галиакберов эгаллади.

“Турнир ҳақидаги таассуротлар ажойиб! Айниқса, бу ерда фақат Қозоғистон ва Ўзбекистон эмас, балки бошқа мамлакатлардан ҳам ёшлар йиғилганидан хурсандмиз. Кўп янги танишувлар, ажойиб ташкилот ва муҳит. Асосий турнирни интиқлик билан кутамиз ва "Zakovat" ҳаракатига миннатдорчилик билдирамиз!” — дея фикр билдирди “ОНК” жамоси аъзоси Денис Галиакберов.

Маълумот ўрнида айтиш керакки, 20 август куни Қирғизистон пойтахти яна бир муҳим интеллектуал тадбир — “Zakovat Asian Cup II”га ҳам мезбонлик қилади. Унда ўзбекистонлик ва қирғизистонлик билимдонлар яна бир бор ўзаро куч синашадилар.