АҚШ олимлари аутизмни даволаш учун янги дорини кашф этди

АҚШ Стенфорд тиббиёт университети тадқиқотчилари аутизмни даволашда катта ютуқларга эришди. Daily Mail нашрининг ёзишича, улар атиги бир доза билан аутизм аломатларини бартараф этадиган янги дори воситасини кашф этган.

Science Advances журналида чоп этилган янги тадқиқотда, сичқонларда аутизм спектрининг бузилишини (PAC) ўрганиш натижасида, тадқиқотчилар таламуснинг сенсор маълумотларни қайта ишлаш учун масъул бўлган ретикуляр ядросидаги гиперактивлик аутистик хатти-ҳаракатлар билан боғлиқлигини аниқлади.

Улар сичқонларга уликсакалтамид деб аталадиган Z944 препаратини қуйди, бу тутқаноқ синдромини даволаш учун эҳтимолий восита сифатида ишлатилади. Натижалар ҳайратланарли бўлди – препарат аутизм аломатларини бартараф этиб, миянинг ушбу соҳаси фаолиятини сусайтирди.

«Тадқиқотчилар препаратни сичқонларга бир марта қуйиш аутизм билан боғлиқ аломатларни, жумладан, ёруғлик ва товушга юқори сезувчанлик, ўз-ўзини рағбатлантириш, такрорий хатти-ҳаракатлар, ижтимоий муаммолар ва тутқаноқ хавфини йўқ қилишини аниқлади», дейилади мақолада.

Тадқиқот натижалари шуни кўрсатдики, эпилепсия ва аутизмни бошқарадиган миядаги жараёнлар бир-бири билан кесишиши мумкин, бу аутизм билан оғриган одамларнинг нима учун кўпроқ тутқаноқдан азият чекишини тушунтиради.

Аутизм билан оғриган одамлар эпилепсия ривожланиш хавфига бутун аҳолига нисбатан 30 баравар кўпроқ мойил деб ҳисобланади. Бу вақт ўтиши билан когнитив функцияларнинг ёмонлашишига, нутқ ва ижтимоий кўникмаларнинг орқага кетишига олиб келиши мумкин.

Тадқиқотчилар Z944 ҳам аутизм, ҳам эпилепсияни даволаш учун ишлатилиши мумкинлигини таъкидлади. Бироқ препарат ҳозирча кенг қўллаш учун мавжуд эмас ва ҳали ҳам эпилепсияда клиник синовлардан ўтказилмоқда. Бу натижаларни одамга қандай қўллаш мумкинлиги ҳам ноаниқ.