Рютте Украина учун хавфсизлик кафолатларини талаб қилди

Хавфсизлик кафолатлари Россия Украина ҳудудини бошқа ҳеч қачон босиб олишга уринмаслигини таъминлаши керак, деди Киевда НАТО бош котиби Марк Рютте.

Фото: Yves Herman/REUTERS

Украина Ғарб иттифоқчиларидан ишончли хавфсизлик кафолатларини олиши керак, деди НАТО бош котиби Марк Рютте Киевда Украина президенти Володимир Зеленский билан қўшма матбуот анжуманида.

Рюттенинг сўзларига кўра, Зеленский ва Россия президенти Владимир Путин ўртасидаги эҳтимолий учрашув бўлгунга қадар, Украина «аниқ дўстлар кучига» эга бўлиши керак. «Ва биз ҳозир айнан шу нарса устида ишлаяпмиз», деб қўшимча қилди Шимолий Атлантика алянси бош котиби.

НАТО бош котиби, шунингдек, ишлаб чиқилаётган хавфсизлик кафолатлари Россия «бошқа ҳеч қачон Украинанинг бир квадрат километрини эгаллаб олишга уринмаслигини» таъминлаши кераклигини таъкидлади. Рюттенинг сўзларига кўра, НАТО ва Қўшма Штатлар бундай кафолатларни тақдим этишда иштирок этади.

Рютте, шунингдек, Европа ва АҚШнинг хавфсизлик кафолатлари Украина мудофаасининг «иккинчи қатлами» бўлишини, биринчиси, Украина армиясининг ўзини кучайтиришини т аъкидлади.

Тайёрлаган: Отабек Матназаров

#Украина #Марк Рютте