Қамчиқ довонидаги «авария»ларда уч киши ҳалок бўлди

Қамчиқ довонида бир кунда иккита йўл-транспорт ҳодисаси содир бўлди ва уч киши вафот этди. Бу ҳақда ЙҲХБ хабар берди.

28 август куни соат 4:40 ларда А-373 автомобил йўлининг Водий—Тошкент йўналишида Lacetti автомашинасини бошқариб кетаётган ҳайдовчи ҳаракат хавфсизлигини таъминлай олмасдан ўзи билан бир йўналишда ҳаракатланиб келаётган юк машинасига урилиб, ЙТҲ содир этган. Оқибатда Lacetti йўловчиси оғир тан жароҳати билан вафот этган. Иккинчи йўловчи эса шифохонага ётқизилган.

Шунингдек, ушбу ҳудудда соат 8:39 ларда Cobalt бошқариб кетаётган ҳайдовчи ҳаракат хавфсизлигини таъминлай олмай, бошқарувни йўқотиб ўзи билан бир йўналишда йўлнинг ўнг томонида ҳаракатланиб кетаётган юк машинасининг орқа қисмига ва йўлнинг ўнг томонида ҳаракатланиб кетаётган яна бир юк машинасига урилган. Оқибатида икки йўловчи оғир тан жароҳатлари билан вафот этган.

Ҳар икки ҳолат юзасидан Поп тумани ИИБ тергов бўлими томонидан Жиноят кодексининг 266-моддаси 2-қисми билан жиноят иши қўзғатилди.