Қўшимча функционаллар
-
Тунги кўриниш
Нобел мукофоти Трамп ва Моди орасига совуқлик туширди – ОАВ
Оқ уй раҳбари Ҳиндистон бош вазирига ўз номзодини Нобел мукофотига кўрсатишини шама қилган. Модининг бундан бош тортгани орага совуқлик туширгани таъкидланмоқда.
Фото: Оқ уй / Global Look Press
АҚШ президенти Доналд Трамп Ҳиндистон бош вазири Нарендра Моди билан телефон орқали суҳбатда Ню-Деҳли ўз номзодини тинчлик бўйича Нобел мукофотига илгари суриши кераклигига ишора қилган. Бу Ҳиндистон бош вазирининг норозилигига сабаб бўлди ва сиёсатчиларнинг муносабатларини кескин ёмонлаштирди, деб ёзди The New York Times (NYT) суҳбатдан хабардор одамларга таяниб.
Бу бош вазир ва президентнинг 17 июн куни бўлиб ўтган суҳбати чоғида содир бўлди, деб аниқлик киритди нашр. Трамп Модига Покистон Америка президентини Ню-Деҳли ва Исломобод ўртасидаги ўт очишни тўхтатиш бўйича музокаралардаги роли учун Тинчлик бўйича Нобел мукофотига номзод қилиб кўрсатишни режалаштираётганини айтган. Кейинчалик Покистон ҳукумати буни ҳақиқатан ҳам амалга оширди.
NYT манбалари Трампнинг сўзларини Моди Покистон ҳукумати билан бир хил йўл тутиши кераклигига «аниқ ишора» деб атади.
Газетанинг ёзишича, Ҳиндистон бош вазири республикачининг сўзларидан ғазабланган ва АҚШ Покистон билан ўт очишни тўхтатиш бўйича келишувга ҳеч қандай алоқаси йўқлигини айтган. Модининг Трамп номзодини қўллаб-қувватлашни истамагани сиёсатчилар ўртасидаги муносабатларни кескин ёмонлаштирди, деб таъкидламоқда NYT.
Покистондан ташқари, Трампнинг тинчлик бўйича Нобел мукофотига номзодини олтита давлат қўллаб-қувватлади. The Economist нашрининг ёзишича, АҚШ президенти ушбу мукофотни олишни жуда ҳам истамоқда.
Трамп ва Моди ўртасидаги муносабатларнинг кескинлашувига, жумладан, Қўшма Штатларнинг Ҳиндистонга қарши жорий қилган божлари ҳам сабаб бўлган. Frankfurter Allgemeine Zeitung нашрининг ёзишича, Трамп сўнгги ҳафталарда Модига тўрт марта қўнғироқ қилишга уринган, бироқ у суҳбатдан бош тортган.
Нашрнинг ёзишича, Трамп Ҳиндистон иқтисодиётини «ўлик» деб атаган ва Ню-Деҳли Россия нефтини сотиб олгани учун ҳинд товарлари импортига қўшимча 25 фоизлик божлар киритганидан кейин Моди «хафа» бўлган. Чора-тадбирлар 27 августдан кучга кирди, Ҳиндистон маҳсулотларини АҚШга импорт қилиш учун умумий бож 50 фоизни ташкил этди.
