Телекоммуникацияларни тартибга солиш агентлигининг вазифалари белгиланди

Вазирлар Маҳкамасининг «Телекоммуникацияларни тартибга солиш агентлиги фаолиятини ташкил этиш чора-тадбирлари тўғрисида»ги қарори қабул қилинди.

Фото: iStock

Президентнинг «Телекоммуникация соҳасида тартибга солиш тизимини такомиллаштириш чора-тадбирлари тўғрисида»ги фармони билан Телекоммуникацияларни тартибга солиш агентлиги ташкил этилган бўлиб, у операторлар ва провайдерлар кўрсатаётган хизматлар сифатининг белгиланган талабларга мувофиқлигини мониторинг қилади.

Ҳужжат билан телекоммуникация соҳасини тартибга солиш агентлиги тўғрисидаги низом тасдиқланган бўлиб, унда қуйидагилар белгиланган:

агентлик фаолиятини ташкил этишнинг асослари ва тартиби;
агентликнинг асосий вазифа ва функциялари;
агентлик фаолияти самарадорлигини баҳолаш тартиби ва мезонлари;
агентлик фаолиятини молиялаштириш ва моддий-техник таъминлаш, унинг ходимларига меҳнат ҳақи тўлаш ва моддий рағбатлантириш тартиби.

Агентликнинг асосий вазифалари:

телекоммуникация соҳасидаги фаолият ва муносабатларни тартибга солиш;
телекоммуникация соҳасида юридик шахслар фаолиятига лицензия ва рухсат бериш;
телекоммуникация тармоқлари ва иншоотларини қуриш бўйича лойиҳа-смета ҳужжатларини экспертиза қилувчи юридик шахсларни аккредитациялаш;
телекоммуникация хизматларининг айрим турларини, шунингдек тармоқлараро уланишлар тарифларини тартибга солиш;
телекоммуникация тармоқларини кенгайтириш тизимини ривожлантириш;
глобал ахборот тармоғининг миллий сегменти манзил фазосидан фойдаланиш тартибини ишлаб чиқиш, домен номлари тизимини белгилаш;
телекоммуникация ускуналарини маркировкалаш;
универсал хизматлар рўйхати ва уларнинг сифатига қўйиладиган талабларни белгилаш;
операторлар ва провайдерлар учун тенг шарт-шароитлар таъминлашга кўмаклашиш;
эркин рақобат асосида телекоммуникация хизматлари бозорини шакллантириш ва ривожлантиришга кўмаклашиш ва бошқалар.