Телекоммуникацияларни тартибга солиш агентлиги директори тайинланди

Ўзбекистон Республикаси президентининг қарори билан, Дилшод Исмоилович Қурёзов Ўзбекистон Республикаси Телекоммуникацияларни тартибга солиш агентлиги директори этиб тайинланди.

Фото: Рақамли технологиялар вазирлиги

Қурёзов тайинловга қадар Вазирлар Маҳкамасининг Сунъий интеллект ва рақамли технологияларни ривожлантириш масалалари департаменти раҳбари ўринбосари – сунъий интеллект технологияларини ривожлантириш бўлими бошлиғи лавозимида фаолият юритган.

Телекоммуникацияларни тартибга солиш агентлиги 2025 йил август ойидаги президент фармони асосида ташкил этилган.

Агентликнинг асосий вазифаларига қуйидагилар киради:

телекоммуникация соҳасидаги фаолият ва муносабатларни тартибга солиш;
телекоммуникация соҳасида юридик шахслар фаолиятига лицензия ва рухсат бериш;
телекоммуникация тармоқлари ва иншоотларини қуриш бўйича лойиҳа-смета ҳужжатларини экспертиза қилувчи юридик шахсларни аккредитациялаш;
телекоммуникация хизматларининг айрим турларини, шунингдек тармоқлараро уланишлар тарифларини тартибга солиш;
телекоммуникация тармоқларини кенгайтириш тизимини ривожлантириш;
глобал ахборот тармоғининг миллий сегменти манзил фазосидан фойдаланиш тартибини ишлаб чиқиш, домен номлари тизимини белгилаш;
телекоммуникация ускуналарини маркировкалаш;
универсал хизматлар рўйхати ва уларнинг сифатига қўйиладиган талабларни белгилаш;
операторлар ва провайдерлар учун тенг шарт-шароитлар таъминлашга кўмаклашиш;
эркин рақобат асосида телекоммуникация хизматлари бозорини шакллантириш ва ривожлантиришга кўмаклашиш ва бошқалар.