Трамп Венесуэладаги наркокартелларга зарба бериш имконини ўрганмоқда

АҚШ президенти Доналд Трамп Венесуэладаги наркокартелларга қарши ҳарбий зарба бериш имкониятини кўриб чиқмоқда. Мамлакат ичидаги нишонларга зарбалар Венесуэла президенти Николас Мадурони заифлаштиришга қаратилган кенгроқ стратегия доирасида амалга оширилиши мумкин. Бу ҳақда манбаларга таяниб CNN хабар берди.

Шу билан бирга, журналистнинг Вашингтон режим ўзгаришини хоҳлайдими, деган саволига жавоб берар экан, Оқ уй раҳбари: «Биз бу ҳақда гапирмаяпмиз», деди. «Аммо биз (Венесуэла) юмшоқ қилиб айтганда, жуда ғалати бўлган сайловлар ўтказгани ҳақида гапиряпмиз», — деди Трамп 2024 йил июлида овозларни сохталаштириш бўйича айбловларга ишора қилиб.

Сўнгги ҳафталарда Қўшма Штатлар Кариб денгизи минтақасига муҳим ҳарбий кучларни жойлаштирди, бу Оқ уйнинг бир қанча расмийларига кўра, қисман Мадуро учун сигнал бўлди.