«Ижобий ўзгариш бор, аммо етарлича эмас» – МБ раиси инфляция даражаси ҳақида

Марказий банк раиси Тимур Ишметовга кўра, 5 фоизлик инфляцион таргетга 2027 йил охирида эришиш кутиляпти. «Йил охири бўйича инфляция прогнозимизни 8,7 фоизга янгиладик. Кўп йўналишлар бўйича инфляция пасайди, лекин бу биз ўйлагандан кечроқ бошланди ва кутганимиздан пастроқ бўляпти. Яъни ижобий ўзгариш бор, аммо етарлича эмас. Шу сабабдан ҳам асосий ставкани ўзгаришсиз сақлаб қолдик», деди у.

11 сентябр куни Марказий банкда бўлиб ўтган матбуот анжуманида регулятор раҳбари Тимур Ишметов инфляцион таргетга эришиш муддати ҳам ҳар йили сурилиб бораётганини қайд этиб ўтди.

«Таргетимиз сурилиб боряпти. Ҳар йили буни тушунтиришнинг ҳаракатини қиляпмиз. Ташқи омиллар ҳам, ишчи омиллар ҳам бор. Йил охири бўйича инфляция прогнозимизни 8,7 фоизга янгиладик. Кўп йўналишлар бўйича инфляция пасайишни бошлади, лекин бу биз ўйлагандан кечроқ бошланди ва кутганимиздан пастроқ бўляпти. Яъни ижобий ўзгариш бор, аммо етарлича эмас. Шу сабабдан ҳам асосий ставкани ўзгаришсиз сақлаб қолдик. Ўйлашимизча, таргетга эришиш 2027 йилнинг охирига бўлади. Бу йил 8,7 бўлса, тушунарли, кейинги йил охирига 5 фоизга тушириш қийин. Октябрда ўзимизнинг асосий прогнозларни чиқарамиз, унда аниқ маълумотларни эълон қиламиз», деди Ишметов.

Эслатиб ўтамиз, Марказий банк 2020 йилда инфляцияни таргетлашга ўта бошлаганди. Ўшанда инфляция бўйича доимий мақсадли кўрсаткич 5 фоиз этиб белгиланган ва бунга 2023 йилга бориб эришиш режалаштирилганди. 2022 йилга келиб, 5 фоизлик кўрсаткичга эришиш муддати 2024 йил охирига кечиктирилди, 2023 йилнинг октябрида бу муддат 2025 йилнинг иккинчи ярмигача чўзилди. 2024 йилда эса асосий сценарийси бўйича таргетга эришиш муддати 2026 йилнинг иккинчи ярмигача, хавфли сценарий бўйича эса 2027 йил охиригача кечиктирилди.

Тайёрлаган: Достон Аҳроров

#Марказий банк #Тимур Ишметов