Жо Байден молиявий қийинчиликларга дуч келгани маълум бўлди

АҚШ собиқ президенти Жо Байден Оқ уйни тарк этганидан кейин камтарона ҳаёт кечирмоқда, деб ёзди The Wall Street Journal. 82 ёшли сиёсатчи ёши, машҳурлигининг пасайиши ва компанияларнинг уни пулли чиқишларга таклиф қилишни истамаслиги туфайли бошқа собиқ президентларнинг даромадлари даражасига эриша олмаяпти.

Байденнинг асосий даромади мемуарлар учун гонорар (10 млн доллар) ва йиллик 416 минг долларлик пенсия ҳисобига шаклланади. Пулли чиқишлар 300-500 минг доллар келтиради, лекин таклифлар жуда кам. Таққослаш учун, Барак ва Мишел Обама ўз хотиралари учун 60 млн доллар олган.

Шу билан бирга, президент катта харажатлар қилмоқда, жумладан, Реҳобот-Бичдаги 2,7 миллион долларлик уй учун ипотекани тўлаш зарурати. Шунингдек, у ўғли Ҳантернинг суд жараёнларини молиялаштиришга ёрдам беряпти ва қизи Эшлининг ажрашиш билан боғлиқ суд харажатларини кўтармоқда.

Пенсилвания университетининг президент кутубхонасини жойлаштиришдан бош тортиши, расмлар ва китоблар савдосидан оила даромадларининг қисқариши, шунингдек, саратон касаллигини даволаш учун тиббий харажатлар унинг учун қўшимча қийинчиликлар туғдиряпти. Байден Делавэр университети қошида президентлик марказини ташкил этиш устида ишламоқда, бироқ маблағ йиғиш ишлари секин кетмоқда.

Собиқ биринчи хоним Жилл Байден йилига 100 минг доллар маош билан ўқитувчилик лавозимини тарк этди ва аёллар саломатлиги бўйича ҳақ тўланмайдиган дастурга раҳбарлик қиляпти.