Теҳрон АЭХА билан ҳамкорликни қайта тиклашни маъқуллади

Эрон Миллий хавфсизлик олий кенгаши ядровий қўмитаси Атом энергияси бўйича халқаро агентлик (АЭХА) билан ҳамкорликни қайта тиклаш бўйича аввал имзоланган келишувларни маъқуллаганини маълум қилди. Кенгаш котибияти баёнотини Эроннинг NourNews агентлиги келтирган. Миллий хавфсизлик олий кенгашига тақдим этилган ҳужжат 9 сентябр куни Қоҳирада АЭХА бош директори Рафаэл Гросси ва Эрон ташқи ишлар вазири Аббос Арағчи томонидан Миср ташқи ишлар вазири Бадр Абдел-Атти воситачилигида имзоланган.

Баёнот матнига кўра, келишувларни амалга ошириш Эрон ядровий иншоотлари хавфсизлигини таъминлашга боғлиқ бўлади. «Эрон ва унинг ядровий объектларига қарши ҳар қандай душманона ҳаракатлар, жумладан, БМТ Хавфсизлик кенгашининг илгари бекор қилинган резолюциялари тикланган тақдирда, ушбу келишувларнинг бажарилиши тўхтатилади», — дейилади ҳужжатда.

Халқаро текширувларнинг тикланиши Эронга Германия, Буюк Британия ва Франция томонидан эълон қилинган янги иқтисодий санкциялардан қочишга ёрдам беради. 2015 йилда бу уч давлат, шунингдек, АҚШ, Хитой ва Россия Ислом Республикаси билан Эроннинг ядровий қурол ишлаб чиқаришига йўл қўймаслик учун атом дастури бўйича келишув тузган эди. 2018 йилда, Доналд Трампнинг биринчи президентлик муддати давомида АҚШ бир томонлама равишда келишувдан чиқди ва Эронга қарши янги санкциялар киритди.