Украиналик кинорежиссёр Сенцов Украина армияси баталони қўмондони бўлди

Россиянинг кенг кўламли уруши бошланганидан бери Украинани ҳимоя қилган Кремл собиқ сиёсий маҳбуси режиссёр Олег Сенцов Украина Қуролли кучларининг 47-бригадаси баталони қўмондони бўлди.

Фото: Yuriy Grigorovich

2014 йилдан 2019 йилгача Россияда сиёсий маҳбус бўлган украиналик кинорежиссёр ва сценарийнавис Олег Сенцов Украина Қуролли кучлари баталонларидан бирига қўмондон бўлди. Бу ҳақда Киевдаги YES конференцияси чоғида маълум бўлди, деб хабар беради «Интерфакс-Украина». Сенцов 47-алоҳида «Магура» механизациялашган бригадасига баталон командири этиб тайинланган, дейилади хабарда.

Режиссёр 2022 йил март ойида, Россиянинг Украинага кенг кўламли ҳужуми бошланганидан кўп ўтмай, Киевнинг ҳудудий мудофаасига қўшилган. Кейинчалик у Украина Қуролли кучларининг 47-бригадасига ўтказилди ва у ерда взвод командиридан ҳужумкор рота командири даражасига кўтарилди. Украинанинг «Обозреватель» нашри таъкидлаганидек, у бу лавозимда тўрт ой хизмат қилган, шундан сўнг янги лавозимни эгаллаган — баталон қўмондони.

Ҳарбий хизмат даврида режиссёр бир неча бор шиддатли жангларда, хусусан, Авдийивка яқинида қатнашган ва бир неча бор яраланган. 2023 йилда у биринчи марта жангда яралангани ва касалхонада даволанаётганини омма олдида тасдиқлади. Кейин Олег Сенцов контузиядан кейин фронтга қайтди.

Тайёрлаган: Отабек Матназаров

#Украина #Олег Сенцов