Фаластин давлатининг тан олиниши ҲАМАС учун мукофот бўлади – Трамп

Доналд Трамп Ню-Йоркда БМТ Бош ассамблеясида сўзга чиқиб, Ғазо секторидаги урушни зудлик билан тўхтатишга ва ҲАМАС томонидан гаровга олинган барча одамларни озод қилишга чақирди.

«Афсуски, ҲАМАС тинчлик ҳақидаги оқилона таклифларни бир неча бор рад этди. Энди БМТ баъзи аъзолари можаронинг давом этишини рағбатлантиргандек, Фаластин давлатини бир томонлама тан олишга интилмоқда. Бу ҲАМАС террорчиларининг ваҳшийликлари учун жуда катта мукофот. Бу ўша даҳшатли ёвузликлар, жумладан, 7 октябр воқеалари учун мукофот бўларди», деди Оқ уй раҳбари.

Трампнинг фикрига кўра, ҲАМАСни қўллаб-қувватлаш ўрнига, жаҳон ҳамжамияти "битта чақириқ билан бирлашиши" керак.

«Гаровдагиларни ҳозироқ озод қилинг, шунчаки гаровдагиларни озод қилинг. Ғазодаги урушни зудлик билан тўхтатишимиз керак. Биз зудлик билан музокараларни бошлашимиз керак. Биз сулҳ тузиш ҳақида келишиб олишимиз керак», деди у.

БМТ Бош Ассамблеяси арафасида бир қатор давлатлар, жумладан, Буюк Британия, Франция, Канада, Австралия ва Португалия Фаластин давлатчилигини тан олганини эълон қилди. Умуман олганда, БМТга аъзо 193 давлатдан 145 дан ортиғи Фаластинни тан олган.