Rheinmetall Латвияда янги қурол заводи қуради

Rheinmetall компаниясининг Латвиядаги 155 мм артиллерия ўқ-дорилари заводи 2027 йилда ишга тушиши кутилмоқда.

Фото: Marcus Brandt/dpa/picture alliance

Германиянинг Rheinmetall мудофаа компанияси Латвияда Valsts aizsardzības korporācija (Миллий мудофаа корпорацияси, VAK) билан ўқ-дорилар ишлаб чиқарувчи завод қуриш бўйича шартнома имзолади. Компаниялар вакиллари 25 сентябр, пайшанба куни Ҳамбургда Латвия бош вазири Эвика Силина иштирокида тегишли ҳужжатларни имзолади.

Заводнинг қурилиши 2026 йилнинг баҳорида, ишлаб чиқариш эса бир йилдан кейин бошланиши кутилмоқда. Лойиҳа 275 миллион евролик сармояни ўз ичига олади ва тахминан 150 иш ўрни яратилиши кутилмоқда. Завод йилига ўн минглаб 155 миллиметрли артиллерия снарядларини ишлаб чиқариш имкониятига эга бўлади, улардан НАТО давлатлари фойдаланади.

Rheinmetall Waffe Munition GmbH заводнинг 51 фоиз улушини олади, Латвиянинг Valsts aizsardzības korporācija эса 49 фоиз улушга эга бўлади. VAK'нинг хабар беришича, завод Латвиянинг ўз артиллерия снарядларини ишлаб чиқариш линиясига айланади ва унинг мудофаа қобилиятини мустаҳкамлайди.