Трамп дори, юк машиналари ва мебелга янги божлар жорий қилди

1 октябрдан бошлаб АҚШ импорт қилинадиган дори-дармонларга 100 фоиз, юк машиналарига 25 фоиз ва мебелларга 50 фоизгача божлар жорий қилади. Оқ уй бу чораларни миллий хавфсизликни ҳимоя қилиш билан тушунтирди.

Фото: REUTERS

АҚШ президенти Доналд Трамп импорт қилинадиган дори воситалари, юк машиналари ва мебелларга янги тарифлар жорий этилишини эълон қилди. 1 октябрдан бошлаб барча брендлар ва патентланган дори-дармонларга 100 фоизлик тариф қўйилади, бу агар компаниялар АҚШда ишлаб чиқариш қувватларини қурмаса юз беради. Бу ҳақда у 25 сентябр, пайшанба куни ўзининг Truth Social ижтимоий тармоғидаги аккаунтида маълум қилди.

Трамп алоҳида баёнотида барча хорижда ишлаб чиқарилган юк машиналарига 25 фоизлик бож жорий этилишини эълон қилди. Унинг сўзларига кўра, бу чора Америка ишлаб чиқарувчилари, жумладан Peterbilt, Kenworth, Freightliner ва Mack Trucks компанияларини қўллаб-қувватлаш учун керак. Америка раҳбари ўз қарорини бошқа нарсалар қаторида «миллий хавфсизлик» билан ҳам изоҳлади.

Мебелга ҳар хил ставкалар қўйилади: ошхона жиҳозлари, ювиш ускуналари ва тегишли маҳсулотларга 50 фоизлик, юмшоқ мебелларга эса 30 фоизлик тариф киритилади.

Сўнгги ойларда Трамп кўплаб савдо шериклари билан тариф сиёсатини кескин кучайтирди. Бундан ҳам юқори тарифларнинг олдини олиш ва башорат қилишни таъминлаш учун Европа Иттифоқи 7 августдан бери аксарият товарларга қўлланадиган 15 фоизлик умумий тарифга рози бўлди.

АҚШ Европа Иттифоқи автомобилларига тарифларни пасайтиришни кечиктирди ва уларни олдинги 27,5 фоиздан 1 августдан бошлаб 15 фоиз этиб белгилади. Бироқ, бу даража Трамп лавозимига киришгунга қадар белгиланган кўрсаткичдан юқорилигича қолмоқда. Қўшма Штатлар ҳали ҳам пўлат ва алюминийдан 50 фоиз бож оляпти.

Тайёрлаган: Отабек Матназаров

#АҚШ #Доналд Трамп #божлар