Қўшимча функционаллар
-
Тунги кўриниш
АҚШ Колумбия президентининг Ню-Йоркдаги нутқидан кейин визасини бекор қилди
Густаво Петро Ню-Йоркда «фаластинпарастлар намойишида» нутқ сўзлаганидан кейин АҚШ Давлат департаменти томонидан «масъулиятсиз ва гижгижловчи ҳаракатларда» айбланди.
Фото: Michael Nagle/Bloomberg
АҚШ расмийлари Колумбия президенти Густаво Петронинг Ню-Йоркдаги баёнотлари ортидан визасини бекор қилди.
Қайд қилинишича, Петро Ню-Йорк шаҳрида «фаластинпарастлар намойишида» нутқ сўзлаган ва АҚШ ҳарбийларини президент Доналд Трампнинг буйруқларига бўйсунмасликка чақирган.
«... Колумбия президенти Ню-Йорк кўчасида чиқиш қилиб, америкалик аскарларни буйруқларга бўйсунмасликка чақирди ва зўравонликка ундади. Биз Петро визасини унинг масъулиятсиз ва гижгижловчи ҳаракатлари туфайли бекор қиламиз», дейилади Давлат департаменти баёнотида.
Қайд этилишича, митинг чоғида Петро Ғазодаги урушни «геноцид ва инсониятга қарши жиноят» деб атаган ва «инсоният жавоб бериши кераклигини» таъкидлаган.
Густаво Петро ёшлигида М-19 сўл радикал партизан ҳаракати аъзоси бўлган, демобилизация қилинганидан кейин сиёсат билан шуғулланган. 1991 йилда Колумбия Вакиллар палатаси депутати этиб сайланди, 1994 йилдан 1996 йилгача мамлакатнинг Белгиядаги элчихонасида ишлади, кейин яна парламентга кирди. 2006-2010 йилларда сенатор, 2012-2015 йилларда пойтахт Богота шаҳри ҳокими бўлди. 2022 йил июн ойида у президентлик сайловида ғалаба қозонди ва 7 август куни ўз лавозимини эгаллаб, Колумбия тарихида чап қанот вакилларидан биринчи президент бўлди.
