Нетаняҳу БМТда Фаластиннинг тан олинишини Ғарб учун шармандалик деб атади

Исроил бош вазири Бинямин Нетаняҳу яқинда Фаластин давлатини тан олган Ғарб давлатларини фаоллар босимига берилиб кетганликда айблаб, уларни кескин танқид қилди.

Нетаняҳу 26 сентябр, жума куни Ню-Йоркда БМТ Бош ассамблеясида ўзининг 40 дақиқалик нутқида Ғазо секторида ҲАМАС гуруҳи йўқ қилинмагунча ёки қуролларини ташламагунча унга қарши урушни давом эттиришга ваъда берди. «Охирги элементлар, ҲАМАСнинг сўнгги қолдиқлари Ғазо шаҳрида жойлашди. Улар кучлари қанчалик камайтирилмасин, 7 октябрдаги ваҳшийликларни қайта-қайта такрорлашга ваъда берди. Шунинг учун Исроил ишни тугатиши керак. Шунинг учун биз буни имкон қадар тезроқ қилишни хоҳлаймиз», деб эълон қилди Исроил бош вазири.

Ғазо секторида ушлаб турилган исроилликларга мурожаат қилиб, у иброний тилида шундай деди: «Биз сизни бир сония ҳам унутганимиз йўқ».

Бинямин Нетаняҳу нутқи олдидан кўплаб делегациялар БМТ Бош ассамблеяси залини тарк этди, трибунадаги айрим томошабинлар эса уни узоқ қарсаклар билан кутиб олган, дея хабар беради dpa ахборот агентлиги.