Зеленский: Россия ЕИ осмонига дронларни танкерлардан учириши мумкин

Украина президенти Володимир Зеленскийнинг фикрича, Россия Европа ҳаво ҳудудига учувчисиз учоқларни учириш учун танкерлардан фойдаланаётган бўлиши мумкин. «Ҳозирда бизда разведка маълумотлари бўлиб, унга кўра руслар Европа давлатларига қарши дронларни учириш ва назорат қилиш учун танкерлардан фойдаланмоқда», деди у 28 сентябр, якшанба куни кечки видеомурожаатида.

Украина давлат раҳбарининг қўшимча қилишича, Киев келаси ҳафта ЕИнинг Россияга қарши 19-санкция пакети бўйича Европа қарорларини кутмоқда. «Санкциялар Россиянинг энергетика савдосига ва Россия танкерлари флотининг бутун инфратузилмасига жиддий зарба бериши айниқса муҳим», — деди Зеленский.

Унинг сўзларига кўра, БМТ Бош ассамблеясининг 80-сессияси «юқори ҳафтаси» давомида Россия Украинага қарши ҳужумлар уюштириш учун «том маънода ҳар куни, ҳар соат»дан фойдаланган. «Улар (Россия томони вакиллари) барча ҳақиқий тинчлик таклифларини рад этди ва бу чинакам қаттиқ босимга лойиқдир», деб ҳисоблайди Украина раҳбари.

Зеленскийнинг эслатишича, 28 сентябр куни Россиянинг Украинага оммавий ҳужумидан сўнг Запорижжя, Киев, Киев вилояти ва бошқа ҳудудларда оқибатларни бартараф ишлари кун бўйи давом этган. «Зарба берилган жойларнинг аксарияти оддий уйлар, фуқаролик объектлари бўлди. 80 дан ортиқ киши жароҳат олди. Афсуски, тўрт киши ҳалок бўлди, улардан бири ёш бола», — деди президент.