YouTube Трампнинг аккаунтини блоклагани учун миллионлаб пул тўлайди

Доналд Трампнинг YouTubeʼга қарши даъвоси 2021 йилги Капитолийдаги тартибсизликлар ортидан унинг аккаунтининг блокланиши билан боғлиқ эди. У Facebook ва Twitterʼга қарши ҳам худди шундай даъволарни қўзғатган.

Скриншот

YouTube видеохостинги АҚШ президенти Доналд Трампнинг 2021 йилдаги Капитолий тартибсизликлари ортидан ўз аккаунтини 2021 йилда вақтинчалик блоклагани юзасидан берган даъвосини ҳал қилиш учун 24,5 миллион доллар тўлашга рози бўлди. Бу ҳақда 30 сентябр, сешанба куни AP хабар берди.

Шартнома шартларига кўра, ушбу сумманинг 22 миллион доллари Оқ уйдаги бал залини қуриш учун масъул бўлган Trust for the National Mall ташкилотига йўналтирилади. Қолган 2,5 миллион доллар иш бўйича бошқа даъвогарлар, жумладан, ёзувчи Наоми Вулф ва Америка консерватив иттифоқи ўртасида тақсимланади.

YouTubeʼга эгалик қилувчи Alphabet Доналд Трамп билан даъвони ҳал қилган учинчи йирик технология компаниясига айланди. У Оқ уйни тарк этгач, 2021 йилда ижтимоий тармоқлардаги аккаунтларини ноқонуний цензура деб ҳисоблаган ҳолда блокланишига қарши судга даъво қилган.

Трампнинг Facebook, Instagram, YouTube ва Twitter саҳифалари президентлик сайлови натижаларидан норози бўлган тарафдорлари Капитолий биносига бостириб кирганидан сўнг блокланган эди. Ижтимоий тармоқ раҳбарлари Трамп ўз постлари билан ҳужумни маъқуллаган деган хулосага келди.

Январ ойида Meta Platforms Трампнинг Facebook аккаунтини блоклагани билан боғлиқ даъвосини ҳал қилиш учун 25 миллион доллар тўлашга рози бўлди. X компанияси Трампнинг Twitterʼга қарши даъвоси учун 10 миллион доллар тўлашга рози бўлди.

Тайёрлаган: Отабек Матназаров

#YouTube #Доналд Трамп