«Бу қийин эмас» – Каннаваро Италияга қарши ўртоқлик ўйини эҳтимоли ҳақида

Ўзбекистон миллий жамоасининг янги бош мураббийи Фабио Каннаваро Ўзбекистон ва Италия ўртасида ўртоқлик учрашуви ўтказиш эҳтимоли ҳақидаги саволга жавобан Осиё жамоалари савиялари ўсиб бораётганини инобатга олган ҳолда бу иш қийин эмаслигини айтиб ўтди.

«Биринчи навбатда Ўзбекистон мундиал иштирокчиси, Италия эса ҳали йўлланма олмади. Мамлакатим учун афсусдаман, футбол фақат Европада эмас, бутун дунёда жумладан, Осиёда шиддат билан ривожланмоқда. Осиё терма жамоаларининг савияси ошиб бораётгани сабаб Италияга қарши ўйин ўтказиш қийин эмас. Футбол раҳбарияти болалар футболига эътибор қаратган, тизимли ривожланиш учун мана шундай Миллий футбол маркази қурилди.

Мен 8 ёшимдан бери футболдаман, у мен биладиган ягона соҳа. Умид қиламанки, вақт ўтиб бундан-да ривожланамиз.

Бир ой аввал бу ерга ташриф буюрдим. Ўшанда ҳазил тариқасида ишлашга тайёрлигимни айтгандим, бу эса амалга ошди. Албатта, футболчиларни ҳам кузатдим, лекин машғулотларда бу яққол намоён бўлади. Бугун футболчилар билан кўришдик, улар орасида италянчада сўзлашадиганлари ҳам бор. Мураббий ва футболчилар коммуникацияси жуда муҳим. Тимур Кападзе билан ҳам йиғинга чақирилган футболчилар борасида гаплашдик. Маҳаллий мутахассислар штабда бўлиши тарафдориман, бу мен учун жуда катта ёрдам беради. Футболчилар менталитети, мамлакат маданиятини тез ўзлаштириш зарур, шу сабаб Равшан Эрматовдан бу ҳақда ўзим ҳам илтимос қилдим.

Суперлига ўйинларини ҳам кузатиб бораман, айтиб ўтганимдек, футболчиларни майдонда кузатиш энг яхши таассуротни беради.

Мен жуда кўп чемодан билан келдим. Мақсадим бу ерда кўпроқ бўлиш, ҳатто велосипедимни ҳам олиб келдим, уни ҳайдашга вақтим бўладими, йўқми билмадим, лекин кўпроқ одамлар орасида бўлишни ёқтираман. Катта иштиёқ билан келдим, ёшлар ва ўсмирлар жамоаларининг ўйинларини ҳам кузатиб бораман, катта иштиёқ билан келдим», – Фабио Каннаваронинг сўзларини келтирмоқда ЎФА матбуот хизмати.

У Ўзбекистон чемпионати савиясини ошириш устида ҳам ишламоқчи. 

«Суперлига интенсивлигини ошириш керак, бу борада раҳбарият билан гаплашамиз. Ўйин давомида юқори темп билан қанча кўп ҳаракат қилсак, натижалар яхшилана бошлайди. Футболчилар тикланишлари ҳам жуда муҳим. Клублардаги мураббийлардан ҳам илтимос қилардик, футболчиларнинг кунлик, ҳафталик ёки ойлик кўрсаткичларини юборишса, шунда бизда уларнинг натижалари ўсяптими ёки аксинча билиш имкони бўлади. Жаҳон чемпионатидаги темп умуман бошқа даража, буни ишонч билан айта оламан.

Менга 7-8 та жойдан таклиф бор эди. Аввало жамоа мундиалга чиққани, бу ердаги лойиҳанинг жиддийлиги мени таклифни қабул қилишга ундади. Жаҳон чемпионатида ўйнаш қийинми, ҳа, жуда қийин, бироқ ҳаракат қиламиз. Агар 8 ойда ҳам жамоа билан коммуникация ўрната олмасам, демак менда муаммо бор, деб ҳисоблаш мумкин.

Ноябр ойида миллий жамоа Дубайдаги халқаро турнирда иштирок этишни режалаштирмоқда. Бироқ шартнома имзоланмагунча бу ҳақда расман айта олмаймиз», – деган Каннаваро.