Зеленский: Россия ўз қуроллари учун хорижий деталларни оляпти

Россиянинг Украинага кенг кўламли қуролли босқинининг тўртинчи йилида Россия Федерацияси ўз қуроллари учун Ғарб компонентларини олишда давом этмоқда. Бу ҳақда 6 октябр, душанба куни Украина президенти Володимир Зеленский Telegramʼда маълум қилди.

«5 октябрга ўтар кечаси Украинага уюштирилган оммавий зарбалар чоғида Россия Қўшма Штатлар, Хитой, Тайван, Буюк Британия, Германия, Швейцария, Япония, Корея Республикаси ва Нидерландия компанияларидан 102 785 та чет элда ишлаб чиқарилган бутловчи қисмларни ўз ичига олган 549 та қуролдан фойдаланган. Учирилган ҳужумкор дронларда тахминан 100 688 та хорижда ишлаб чиқарилган компонентлар, жумладан, 1500 таси «Искандер» ракеталарида, 192 таси «Кинжал» ракеталарида ва 405 таси «Калибр» ракеталарида бўлган».

Украина раҳбарининг сўзларига кўра, АҚШ компаниялари, хусусан, Х-101 ракеталари ва Shahed/"Герань" дронлари учун конвертерлар, ушбу УУА ҳамда "Кинжал" ракеталари учун матрицалар, дрон ва ракеталар учун аналог-рақамли конверторлар, шунингдек, ракеталар учун микроэлектроника ишлаб чиқаради. «Ҳар бир Shahed'даги камида эллик дона турли микроэлектроника Хитой ва Тайванда ишлаб чиқарилган», — деди Зеленский.

Россия ҳарбийлари томонидан учириладиган дронлар учун микроконтроллерлар Швейцарияда, учувчисиз учоқларни бошқариш учун микрокомпютерлар эса Буюк Британияда ишлаб чиқарилади, дея давом этди Украина президенти. Россия қанотли ракеталари учун оптоизоляторлар, дея қўшимча қилди у, Японияда, коннекторлари эса Германияда ишлаб чиқарилган. «Россия Нидерландияда ишлаб чиқарилган процессорлардан, Жанубий Кореяда ишлаб чиқарилган серво драйвлар ва подшипниклардан ҳам фойдаланади», — деди Зеленский.