Роналду – тарихдаги илк миллиардер футболчи бўлди

Криштиану Роналду тарихдаги биринчи миллиардер футболчига айланди. Американинг Bloomberg компанияси унинг бойлигини 1,4 миллиард долларга баҳолаган. У кўп вақт давомида реклама ва шахсий брендлари орқали миллионлаб маблағ ишлаб топган, аммо айнан «Ан-Наср» билан шартномаси унга миллиардлик довондан ўтиш имконини берди.

40 ёшли ҳужумчи жорий йил ёзида Саудия Арабистони клуби билан шартномасини яна икки йилга узайтирганди. Манба маълумотига кўра, келишув қиймати 400 миллион долларга тенг. Криштиану йилига 200 миллион долларлик маош олади, келишувни имзолашга розилик бергани учун яна 30 миллион долларлик бонус олади. Шунингдек, Роналду клубда 15 фоизлик улушга эга.

Bloomberg ҳисоб-китобларига кўра, 2002 йилдан 2023 йилга қадар Роналду «Манчестер Юнайтед», «Реал» ва «Ювентус» каби гранд клублар билан шартномалари орқали 550 миллион доллардан ортиқ маблағ ишлаб топган – бу фақат маошларни ўз ичига олади, рекламалар ҳисобда эмас. У Armani ва Castrol каби брендлар билан шартнома келишувларига эга, Nike билан ўн йиллик шартномаси эса унга йилига 18 миллион доллардан даромад келтирган.

Шунингдек, футболчи шахсий лойиҳаларини ҳам ривожлантирган: CR7 бренди остида Pestana CR7 Hotels меҳмонхоналар тармоғи (Португалиянинг Pestana гуруҳи билан ҳамкорликда) ва CR7 Fitness фитнес-марказлари ишлайди. У падел-кортларга сармоя киритган, кийим, оёқ кийимлар, ички кийимлар, парфюмерия ва аксессуарлар ишлаб чиқаришни йўлга қўйган. 2024 йилда у Испаниядаги чинни ишлаб чиқарувчи компанияга инвестиция киритган. Bloomberg унинг бизнес-активлари қийматини 300 миллион доллардан юқорироқ баҳолаган.

Материалда қайд этилишича, Роналду энди молиявий жиҳатдан Лионел Мессини анча катта фарқ билан ортда қолдирмоқда, аргентиналик футбол юлдузининг бойлиги 600 миллион доллар атрофида баҳоланган.

Роналду миллиардлик довондан ўтган илк футболчи, аммо у бу борадаги биринчи спортчи эмас. Бунгача Майкл Жордан (Forbes баҳолашича — 3,8 миллиард доллар бойликка эга) ва Роджер Федерер (1,3 миллиард доллар атрофида) кабилар бу рўйхатга кириб бўлганди.

Bloomberg айнан «Ан-Наср» билан шартнома Кришни миллиардерга айлантирганини қайд этган. Саудия клублари ҳозирда катта пуллар сарфламоқда. FootyStats маълумотига кўра, лигада энг юқори маош олувчи футболчилар рўйхатида Карим Бензема, Нголо Канте ва Садио Мане каби юлдузлар ҳам бор.