Павел Дуров «эркин интернетни қутқаришга» чақирди

Telegram асосчиси Павел Дуров 10 октябр куни, 41 ёшга тўлган кунида интернетдаги эркинликка бағишланган пост эълон қилди.

«Бизнинг авлодда оталаримиз томонидан биз учун яратилган эркин интернетни қутқариш учун борган сари камроқ вақт қолмоқда», деб ёзди Дуров.

Telegram асосчисининг фикрича, «бир вақтлар эркин ахборот алмашиш ваъдаси бўлган нарса назоратнинг энг муҳим воситасига айланмоқда».

«Бир пайтлар эркин бўлган мамлакатлар антиутопик чораларни жорий қилмоқда», деди Дуров. Хусусан, «Германия интернетда амалдорларни танқид қилишга журъат этган ҳар қандай кишини таъқиб қилади. Буюк Британия минглаб одамларни твитлари учун қамоққа ташламоқда».

«Франция эркинлик ва шахсий ҳаёт дахлсизлигини ҳимоя қилувчи технологик етакчиларга нисбатан жиноий тергов олиб бормоқда», деб ёзди Дуров. Айни пайтда унга нисбатан Франция ҳуқуқ-тартибот идоралари жиноий ишни тергов қилмоқда.

«Бизнинг авлод эркинликка эга бўлган ва уни тортиб олишга имкон берган охирги одам сифатида тарихга кириши мумкин», деди Telegram асосчиси.

«Йўқ, мен бугун байрам қилмоқчи эмасман. Вақтим тугаяпти. Вақтимиз тугаб бормоқда», деб қўшимча қилди у.

Павел Дуров Францияда тергов ва назорат остида. Мамлакат расмийлари уни ваколатли органларнинг сўровлари бўйича маълумот беришдан бош тортганликда, вояга етмаганларнинг порнографик характердаги ҳакерлик дастурлари ва тасвирларини тарқатишда иштирок этганликда, шунингдек, жиноий ҳаракатлар оқибатида олинган пулларни легаллаштиришда айблаган.

Telegram бир неча бор Россия махсус хизматлари билан алоқада бўлганликда ва фойдаланувчилар маълумотларини ошкор қилганликда гумон қилинган. Мессенжер раҳбарияти, жумладан Дуров бу айбловларни қатъиян рад этиб келади.