Telegram орқали алданган бухгалтер фирибгарларга 1 млрд сўм ўтказиб берди

Бухорода бухгалтер бўлиб ишловчи аёл Telegram орқали ўзини Марказий банк ходими деб таништирган фирибгарларга ишониб, 1 миллиард сўмдан ортиқ маблағини йўқотди. Кибержиноятчилар пулларни дроп-карталар орқали ечиб олиб, бир қисмини криптовалютага айлантирган.

Маълум қилинишича, ҳодиса 2025 йил декабрь ойида содир бўлган. Жиноят схемаси тафсилотлари ИИВ томонидан 10 май куни очиқланган.

Фирибгарлар аёл билан Telegram орқали боғланиб, ўзларини Марказий банкнинг масъул ходимлари сифатида таништирган. Улар тижорат банклари ходимлари унинг жамғармаларини ўғирлашга уринаётганини айтиб, маблағларни “хавфсиз карталар”га ўтказишни тавсия қилган.

Натижада жабрланувчи тўртта турли банкдаги барча маблағларини фирибгарлар айтган ҳисобларга ўтказиб берган. Умумий зарар миқдори 1 миллиард 9 миллион сўмни ташкил этган.

Тергов маълумотларига кўра, жиноятчилар пулларни дроп-карталар орқали бир нечта ҳудудларда айлантирган. Бу карталар Тошкент, Хоразм, Андижон ва бошқа ҳудудлардаги шахслар номига расмийлаштирилган бўлган.

Схемада ҳатто вояга етмаганлар ва талабалар ҳам иштирок этгани айтилмоқда. Улар банк карталарини воситачиларга 100 минг сўмдан 1 миллион сўмгача бўлган маблағ эвазига сотиб юборган.

Қўлга киритилган маблағлар турли шаҳарлардаги банкоматлар орқали нақдлаштирилган ёки криптовалютага айлантирилган.

Бухоро вилояти ИИБ Кибержиноятларга қарши кураш бошқармаси ходимлари Тошкент шаҳрида ўтказган тезкор тадбир давомида жиноий гуруҳнинг икки нафар асосий ташкилотчисини қўлга олган.

Уларнинг қимматбаҳо автомашиналари кўздан кечирилганда ўнлаб телефонлар, SIM-карталар ҳамда 100 миллион сўмдан ортиқ нақд пул мусодара қилинган.

Ҳозирда гумонланувчиларга нисбатан Жиноят кодексининг 168-моддаси 4-қисми “а” банди билан жиноят иши қўзғатилган.

Маълум қилинишича, талон-торож қилинган 1 миллиард 9 миллион сўм маблағ тўлиқ ундирилиб, жабрланувчи фойдасига қайтарилган.