Самарқандда қиморга муккасидан кетган шахс ака ва укасининг қийноғидан сўнг вафот этди

Ака-ука онлайн қиморга муккасидан кетган ўртанча ўғилни бу йўлдан қайтариш мақсадида дарахтга боғлаб қўйиб, калтаклашган. Оқибатда оғир тан жароҳати олган 29 ёшли йигит вафот этган. «Одамлардан, банкдан қарз олиб, онлайн қиморга тикиб юборарди. Одамлар уйга қарзларини сўраб келарди, акаси ва укаси тўларди», деган ўғилларнинг отаси судда.

{Yii::t(}

Ўтказиб юбориш 6s

Ўтказиб юбориш

Самарқанд шаҳрида қиморга берилган ўртанча ўғилнинг ўлимига сабаб бўлган ака-ука жиноий жазога тортилди. Kun.uz суд ҳужжати билан танишди.

Суд ҳукмида келтирилишича, 30 ёшли У.А. ва 23 ёшли Қ.А. ўртанча ўғил Ж.А.ни қимор ўйинидан қайтариш мақсадида «тарбиялаб» қўймоқчи бўлишган. Улар 2025 йил 20 июн куни соат 15:00 ларда яшаш уйларида Ж.А.ни калтаклаб, арқон билан ҳовлидаги дарахтга боғлаб қўйишган. Сўнгра У.А. ғайриқонуний равишда озодликдан маҳрум қилинган Ж.А.нинг танасининг турли қисмларига сим кабел билан шафқатсизларча уриб, унга қасддан жароҳат етказган. Оқибатда оғир тан жароҳати олган Ж.А. ҳодиса жойида вафот этган.

У.А. судда айбига тўлиқ иқрорлик биллирган ва мақсади укасини қимордан қайтариш бўлганини айтган.

«Ўртанча укам Ж.А. айрим фуқаролардан қарз бўлиб қолганди. Топган пулини онлайн қиморга тикиб юборарди. Уйдаги кўп нарсаларни, турмуш ўртоғи, ҳатто онамга тегишли бўлган тилла тақинчоқларни ҳам сотиб, пулларини онлайн қиморга сарфлаб юборди. 

2025 йил 20 июн куни тушликка яқин укамнинг олдига бориб, тўлаши лозим бўлган кредити нима бўлганини сўрадим. У пулларни қиморга тикиб, ютқазиб қўйгани, ишлаб тўлашини айтди. Унинг гапларидан жаҳлим чиқиб, оғзаки тарзда тортишиб қолдим. Сўнгра уни бу йўлдан қайтариш мақсадида кичик укам Қ.А.га қўнғироқ қилиб, уни чақирдим.

Шу куни соат 15:00 лар атрофида Ж.А.ни урдик. Сўнгра арқон билан ҳовли ўртасидаги дарахтга боғладик. Шундан кейин тахминан 30 дақиқа танасининг дуч келган жойларига сим кабел билан урдим. Кичик укам эса ёнимда қараб турди. Ж.А.нинг юзи, боши ва танаси шилиниб, қон оқа бошлади. Кейин уни арқондан бўшатиб, ювинтирдик ҳамда ташқаридаги кроватга ётқиздик. Ж.А. иссиқ эканини айтгач, уйга олиб кирдик. Сўнгра у дам олишини айтиб, ухлади. Анча вақт ўтгач тоби қочди, юраги секин ура бошлади. Тез тиббий ёрам чақирдик. Етиб келган шифокорлар укам вафот этганини айтишди», деган У.А. суддаги кўрсатмасида.

Ака қилган ишидан пушаймонлигини айтиб, бир укасининг ўлимига, кичик укасининг қамалишига сабабчи бўлганидан виждон азобида қийналаётганини билдирган.

Қ.А. ҳам судда акасиникига ўхшаш кўрсатма берган.

Ж.А.нинг отаси И.Т. ҳам судда кўрсатма бериб, ўртанча ўғли қиморга берилган бўлгани, одамлардан қарзи кўпайиб кетганини маълум қилган.

«Ўртанча ўғлимнинг иши яхши эди, у пайвандлаш ишлари билан шуғулланарди. 3-4 йилдан буён онлайн қимор ўйинларига берилиб қолди. Бу каби ўйинларни ўйнамаслиги ҳақида бир неча марта тайинлаб, танбеҳ берганман. Аммо у гапимга кирмади, ишлаган пулини онлайн қимор ўйинларига тикиб юбораверди. Уйга бирор марта пул олиб келмаган. Акаси ва укаси ҳам қимор ўйнамаслиги, охири барибир қарз бўлиб қолишини айтишса-да, улар билан жанжал қиларди. Қарзи кўпайиб кетди, одамлар уйига пулини сўраб келаверганидан сўнг акаси ва укаси қарзларини тўлаб беришни бошлади. Лекин у одамлардан ҳам, банкдан ҳам қарз олиб, топган пулининг ҳаммасини онлайн қиморга тикишдан қайтмади», деган ота.

И.Т. судда кичик ўғлига қамоқ билан боғлиқ бўлмаган жазо тайинлашни сўраган. 

Самарқанд шаҳар суди ҳукми билан У.А. ва Қ.А. Жиноят кодексининг 138-моддаси (Зўрлик ишлатиб ғайриқонуний равишда озодликдан маҳрум қилиш) 2-қисми «а» банди ва 104-моддаси (Қасддан баданга оғир шикаст етказиш) 3-қисми «д» бандида назарда тутилган жиноятларни содир қилганликда айбли деб топилган. Акага 8,5 йил, укага эса 6,5 йил муддатга озодликдан маҳрум қилиш жазоси тайинланган.