Боливиядаги президентлик сайловида Родриго Пас ғалаба қозонди

Родриго Паснинг ғалабаси Боливиядаги сиёсий бурилишдан далолат беради. Қарийб 20 йил давомида сўллар ҳукмронлик қилган мамлакат христиан-демократлар етакчилигида янги курсга тайёргарлик кўрмоқда.

Фото: Jorge Mateo Romay Salinas/Anadolu/picture alliance

Боливияда 19 октябр, якшанба куни бўлиб ўтган президентлик сайловларининг иккинчи босқичида сенатор Родриго Пас Перейра ғалаба қозонди ва бу мамлакатда қарийб йигирма йиллик сўлчилар ҳукмронлигига якун ясади. Сайлов комиссияси маълумотларига кўра, Partido Democrata Cristiano марказчи христиан-демократик партиясидан номзод «инкор этиб бўлмас устунлик»ка эга бўлиб, тахминан 55 фоиз овоз олди.

Кўп йиллар давомида Боливиянинг сиёсий ҳаёти собиқ президент Эво Моралес ва истеъфога чиқаётган президент Луис Арcе ўртасидаги рақобат билан белгиланди. Иккаласи ҳам Movimiento al Socialismo (MAS) сўл партиясининг вакили эди.

58 ёшли ғолиб, оддийгина Пас номи билан танилган сиёсатчи Ла-Пасдаги митингда шундай деди: «Бугун Боливия ечимларни олиб келувчи ҳукумат пайдо бўлишига ишониши мумкин. Босқичма-босқич Боливия ўзининг халқаро ролини тиклайди». Унинг рақиби, Libertad y Democracia ўнг консерватив партиясидан собиқ президент Хорхе Кирога Пасни табриклади, аммо натижалар расмий эълон қилинишини кутаётганини таъкидлади.

Лотин Америкасидаги энг кўзга кўринган сўл етакчилардан бири Эво Моралес конституциявий чекловлар туфайли яна президентликка номзодини қўйишдан маҳрум бўлди, Арcе эса рейтинги пасайган бир пайтда ўз номзодини қайтариб олди.