Зеленский Трамп ва Путиннинг учрашувида иштирок этишга тайёр

Украина президенти Володимир Зеленский АҚШ ва Россия президентлари Доналд Трамп ва Владимир Путиннинг Будапештда бўлиб ўтиши режалаштирилган учрашувига қўшилишга тайёр. «Мен тайёрман. Президентга [АҚШ президенти Доналд Трампга Оқ уйдаги учрашувда] айтдим. Мен тайёрман», деди Зеленский 19 октябр, якшанба куни NBC News журналистининг Будапештга бориш истаги ҳақидаги саволига жавобан. Президент, шунингдек, адолатли ва мустаҳкам тинчлик учун ҳар икки томон ҳам зарурлигини таъкидлади. «Бизсиз қандай келишувлар бўлиши мумкин?» — деди у.

Украина президенти Россия урушини тугатиш учун мамлакат ҳудудининг бир қисмидан воз кечишга тайёрми, деган саволга Зеленский шундай жавоб берди: «Агар биз бу урушни тўхтатиб, зудлик билан ва дипломатик йўл билан тинчлик музокараларига ўтмоқчи бўлсак, ўзимиз турган жойда қолишимиз ва Путинга ортиқча ҳеч нарса бермаслигимиз керак».

Суҳбат чоғида Украина президенти, шунингдек, Украина ҳозирда «урушда ютқазмаяпти, лекин Россия ҳам ғалаба қозонмаётганини» таъкидлади. Шу сабабли, унинг фикрича, Москва жанг майдонидаги ожизлигини сезиб, украиналик тинч аҳолига қарши ҳаво ҳужумларини кучайтирган. «Шунинг учун у (Владимир Путин) ҳақиқатан ҳам ҳаво ҳужумларини кучайтирмоқда, у қишда энергия фалокатини хоҳлайди», деди Зеленский.

Оқ уй матбуот котиби Кэролайн Левитт аввалроқ журналистларга Вашингтон Володимир Зеленский ҳам саммитда иштирок этишига умид қилаётганини айтганди. 17 октябр куни Вашингтонда Зеленский билан учрашуви олдидан Трамп, ўз навбатида, Украина раҳбари Будапештга келмаслигини, аммо АҚШ президенти «у билан алоқада бўлишини» таъкидлади.