Думa ЕИ «таҳдидлари»ни инобатга олган ҳолда РФ давлат бюджетини маъқуллади

Давлат думаси 2026 йилги РФ давлат бюджети тўғрисидаги қонун лойиҳасини ва 2027 ҳамда 2028 йиллар режасини биринчи ўқишда қабул қилди. Бу ҳақда чоршанба, 22 октябр куни парламент қуйи палатаси сайтида хабар қилинди.

«Биз бюджет мамлакат олдида турган барча масалаларни ҳал этиши, фуқароларимизнинг манфаатларини ҳимоя қилиши учун бор кучимизни сафарбар этдик, чунки ижтимоий стандартлар юқори. Санкциялар ва Европа Иттифоқи томонидан келаётган таҳдидларга қарамасдан, бюджет бу вазифани бажаради», — дейди Давлат думаси раиси Вячеслав Володин.

У бюджетнинг устувор йўналишларини «мудофаа қобилияти ва мамлакат хавфсизлиги» деб атади. Буни РФ молия вазири Антон Силуанов ҳам тасдиқлади. Унинг айтишича, бюджетнинг асосий бандлари — ижтимоий мажбуриятлар, мудофаа ва хавфсизлик. Силуанов алоҳида тарзда «СВО иштирокчиларининг оилаларини ижтимоий қўллаб-қувватлаш»ни — яъни Украинага қарши уруш доирасида — қайд этди.

2026 йилда бюджет дефицити 3,8 трлн рублни ташкил этади (харажатлар — 44,1 трлн рубл, даромадлар — 40,3 трлн рубл). Бу солиқлар оширилишига қарамасдан содир бўлади. Масалан, бизнес учун ҚҚС 15 фоиздан 30 фоизгача оширилади. ҚҚС тўлаш учун даромад чегараси олти баравар кескинлаштирилади: йилига 60 млн рублдан 10 млн рублгача туширилади.

Шу ҳақда гапирар экан, Володин иккинчи ўқишга қадар Молия вазирлиги бизнес учун янги солиқ қоидаларини «ишлаб чиқиш имкониятини кўриб чиқиши»ни маълум қилди. Лекин аниқ тафсилотлар келтирилмаган.

2026 йил бюджети лойиҳасида мудофаа харажатлари — яъни Украинага қарши уруш учун сарфлар — қисман, аммо сезиларсиз даражада камайтирилди: 13,1 трлн рублдан 12,9 трлн рублгача, ёки 1,5 фоизга. Мудофаа сарфлари умумий харажатларнинг тахминан 38 фоиз улуши билан энг йирик банд бўлиб қолмоқда.

Қиёслаш учун: урушдан олдинги 2021 йилда Россиянинг мудофаа харажатлари 3,6 трлн рублни, ёки бюджет сарфларининг 15 фоиздан камини ташкил этган эди.