Украина ЗАЭСга электр узатиш линияларидан бирини тиклади

Линияни таъмирлаш ишлари АЭХА ёрдамида якунланди. Украина Россияни станцияни электр энергияси билан таъминлайдиган инфратузилмани мунтазам равишда ўққа тутишда айбламоқда.

Фото: Andrei Rubtsov/TASS /IMAGO

Россия қўшинлари томонидан босиб олинган Запорижжя атом электр станцияси (ЗАЭС)га олиб борадиган иккита электр узатиш линияларидан бири тикланди. Бу ҳақда Украина энергетика вазири Светлана Гринчук пайшанба, 23 октябр куни давлат телевидениесида эълон қилди. Унинг сўзларига кўра, оккупация бошланганидан бери станцияда ўнинчи марта электр узилиши роппа-роса бир ой давом этган.

750 киловолтлик линияда таъмирлаш ишлари якунланди, иккинчи, 330 киловолтлик линияни тиклаш ишлари эса ҳали ҳам давом этмоқда. Гринчук яна Россия томонини Украина электр тармоғи билан алоқани узиш учун атом электр станциясига олиб борадиган электр тармоқларини мунтазам равишда ўққа тутишда айблади.

Запорижжя оккупацион маъмурияти вакили Владимир Рогов ҳам таъмирлаш ишлари тугаганини тасдиқлади. Унинг сўзларига кўра, Атом энергияси халқаро агентлиги (АЭХА) воситачилигида ишларни бажариш учун вақтинчалик ҳарбий ҳаракатларни тўхтатишга келишиб олинди.

АЭХА шунингдек, биринчи электр узатиш линиясининг тикланганини тасдиқлади.

Умумий қуввати 6000 мегаватт бўлган олтита энергия блокидан иборат Запорижжя атом электр станцияси 2022 йил март ойидан бери Россия қўшинлари назорати остида қолмоқда. Барча реакторлар ўчирилган, аммо доимий совитишни талаб қилади.

Совитиш тизими ташқи тармоқдан қувват олмоқда. Электр узилишлари бўлган тақдирда, дизел генераторлари электр энергиясини таъминлайди.