Тошкент йўлида йирик партия истеъмолга яроқсиз гўшт ушланди

Сирдарёда ЙПХ ходимлари «Қашқадарё–Тошкент» йўналишидаги Cobalt салони ва юкхонасидан ҳужжатсиз 250 кг гўштни аниқлади, экспертиза мол гўшти истеъмолга яроқсиз эканини тасдиқлади, иш прокуратура ҳузуридаги Департаментга ўтказилди.

Вилоят ИИБ маълумотларига кўра, ҳодиса ЙПХнинг «Сирдарё» постида содир бўлган. Йўл-патрул хизмати ходимлари «Қашқадарё–Тошкент» йўналиши бўйлаб ҳаракатланиб келаётган Cobalt русумли автомобилни тўхтатган.

Текширув пайтида автомашина салони ва юкхонасида ҳеч қандай ҳужжатларсиз 250 килограмм гўшт маҳсулоти ташилаётгани аниқланган.

Барча мусодара қилинган партия экспертизага юборилди. Мутахассислар мол гўшти истеъмолга яроқсиз эканини ва инсон саломатлиги учун жиддий хавф туғдиришини аниқлади.

Ушбу ҳолат юзасидан тегишли материаллар расмийлаштирилиб, иш кейинги тергов ҳаракатларини ўтказиш учун Бош прокуратура ҳузуридаги Департаментнинг ҳудудий бошқармасига юборилди.