“Ўлганнинг устига тепган”: Қашқадарёда ўнлаб фуқаронинг кредитга олинган машиналари ғойиб бўлди

Қашқадарёда кредит ботқоғидан чиқишни истаб автомобилини сотмоқчи бўлган фуқаролар алданиб қолди. Уларга машина учун шу пайтгача тўлаган маблағларини қайтариб бериш ва қолган кредитни ўз зиммасига олишни ваъда қилишган. Келишувдан кейин эса на машина топилган, на кредит тўланган. 

Қашқадарё вилоятида кредитга машина олган ўнлаб одамлар фирибгарлар тузоғига тушиб қолди. Жабрланганлар Kun.uz’га мурожаат қилиб, вазият қандай бўлганини айтиб беришди.

Схема қандай ишлаган? 

Мурожаатчиларнинг сўзларига кўра, фирибгарлик схемаси асосан автокредит бўйича тўлов қилаётган, аммо молиявий қийинчиликка дуч келган фуқароларга қаратилган. Уларга машина учун шу вақтгача тўланган маблағни қайтариб бериш, кредит тўловларининг қолган қисмини ҳар ой ўзлари сўндириб бориш, кредит муддати якунланганидан кейин эса автомобилни янги эгаси номига расмийлаштириш ваъда қилинган. 

Ишонч уйғотиш мақсадида машинани қабул қилиб олиш жараёни видеога олинган. Тасвирга олиш вақтида маълум миқдорда пул берилган. Бироқ видеотасвир тугаши билан берилган маблағ қайтариб олинган ҳамда тўлов эртаси куни нотариусда расмийлаштириш вақтида амалга оширилиши айтилган. Сўнгра машина олиб кетилган.

Шу тариқа, машина ғойиб бўлган, берилган ваъда бажарилмаган: алданганлар эса кредитдан қутулмагани етмагандай машинадан ҳам айрилиб қолаверган. 

“Банкка бир сўм ҳам тўланмаган”

Алданганлардан бири Нурбек Шодмонов. Унинг таъкидлашича, фирибгарлар айнан кредитга машина олиб, тўловларни тўлай олмай қолганларни “овлаган”.

“Қарши шаҳрига келишяпти ва автокредитга олинган машиналарни излашяпти.

2024 йил июл ойида кредитга янги Gentra олганман. 54 млн сўм бошланғич тўлов қилганман. Машинанинг таннархи 191 млн 600 минг сўм эди. Ойига 4 млн сўмдан тўлов чиққан. Мен буни тўлашга қийналяпман десам “1000 доллар бошланғич тўлов сизга берамиз, қолган тўловларни ўзимиз давом эттирамиз. Машинани Тошкентга олиб бориб, Rent-car’га ишлатамиз. 1-2 йилдан кейин хоҳласангиз машинани ўзингизга қайтариб берамиз. Сизга банкдан, ҳеч жойдан сўраб келмайди, ойма-ой кредитларингизни ёпамиз ўз вақтида”, деган. 

Уч ойдан кейин мен уларни излашга тушдим. Эрта деяпти, индин деяпти, хуллас бир йил бўлди, бир сўм пул тўламаган банкка”, дейди жабрланувчи.

“Пул бериб, кейин қайтариб олишди”

Яна бир жабрланувчи Чарос Орипованинг таъкидлашича, унинг олдига 8 киши борган.

“Зокир исмли шахс билан 5 йилдан кейин машинани унинг номига ўтказиб беришим учун ўртада шунчаки келишув бўлди. Мен машинани олиб кетишларига рухсат ҳам, ишончнома ҳам бермадим. Бизга 800 доллар пул беришди, аммо видеосъёмка ўчар-ўчмас уни қайтариб олишди. Нега ундай қилишганини сўрасам, нотариусда ҳамма харажатларни ҳал қилишини айтди. Шу билан машинани ҳайдаб кўришларини айтиб чиқиб кетишди. Ўшандан бери машинани ҳам, уларнинг ўзини ҳам кўрмадим”, дейди у.

Бири қамалди...

Мурожаатчиларга кўра, ҳолат юзасидан 4 кишига нисбатан жиноят иши қўзғатилган. Музаффар Шодмоновга оид жиноят иши судда кўриб чиқилган.

ЖИБ Қарши шаҳар судининг 2026 йил 18 майдаги ҳукми билан Музаффар Шодмонов Жиноят кодексининг 168-моддаси (фирибгарлик) 3-қисми “”а, б” бандларида назарда тутилган жиноятни содир қилишда айбли деб топилган. Унга 6 йил муддатга озодликдан маҳрум қилиш жазоси тайинланган.

Шунингдек, Музаффар Шодмонов ва бошқалардан 13 нафар жабрланувчи фойдасига етказилган зарар суммаларини ундириш белгиланган.

Мурожаатчиларнинг маълум қилишича, қолган гумондорлар бўйича ҳозирда тергов ҳаракатлари олиб борилмоқда.