Беларусда «Орешник» декабрда жанговар навбатчиликка қўйилади

Россиянинг «Орешник» ракета мажмуаси декабр ойида Беларусда жанговар навбатчиликка қўйилади, деб маълум қилди Беларус раҳбари Александр Лукашенконинг матбуот котиби Наталия Эйсмонт сешанба, 28 октябр куни. Унинг сўзларига кўра, «‘Орешник’ни Беларус Республикасида жойлаштириш учун шароит яратиш ишлари якунланмоқда».

«Жорий йил декабрида у жанговар навбатчиликка қўйилади, шу боис ‘Орешник’ бўладими-йўқми деган ҳар қандай гап-сўзларга чек қўйилди», — дея Эйсмонтнинг сўзларини келтиради ТАСС агентлиги.

Лукашенко шу куннинг ўзидаёқ бу қуролни Беларусда жойлаштириш тажовуз эмас, балки «минтақадаги вазият эскалацияси ва замонавий таҳдидларга нисбатан жавоб чораси» эканини айтди. «Биз ҳеч кимга таҳдид солмаяпмиз, фақат ўз хавфсизлигимизни таъминлаяпмиз. Қолаверса, ҳар доим конструктив мулоқот ва тарангликни пасайтиришга қаратилган ўзаро қадамларга очиқмиз», — дея Лукашенко сўзларини келтиради БелТА агентлиги.

Унинг таъкидлашича, агар Европа мамлакатлари янги ракета мажмуаларини жойлаштиришдан воз кечса, «Орешник»ни мамлакатда жойлаштириш тўхтатилиши мумкин.

Россия президенти Владимир Путин 1 август куни Валаам оролида Лукашенко билан учрашувда Россияда ўрта масофага мўлжалланган «Орешник» ракета мажмуасининг илк серияси ишлаб чиқилганини ва у бир бор Россиянинг Украинага қарши урушида қўлланганини, шунингдек РФ Қуролли кучларига топширилганини айтган эди. Унинг сўзларига кўра, шундай яна бир мажмуа Беларусга юборилиши режалаштирилган.

12–16 сентябр кунлари Беларус ҳудудида Россия–Беларус стратегик машғулотлари — «Запад-2025» — бўлиб ўтди. Манёврлар доирасида, жумладан, ядровий қурилма олиб юриши мумкин бўлган «Орешник» баллистик ракетасини қўллаш эҳтимолини режалаштириш ҳам машқ қилинди.