Nvidia компанияси дунёда биринчи бўлиб $5 трлн капитализацияга эришди

Компания акциялари сўнгги бир неча йил ичида унинг сунъий интеллект чипларига бўлган юқори талаб туфайли фаол ўсиб бормоқда.

Фото: Reuters

29 октябрь куни NASDAQ биржасида савдолар очилгандан сўнг Американинг Nvidia технологик корпорацияси акциялари 5 фоизга ошди. Унинг капиталлашуви 5,01 триллион долларга етди. Шу тариқа, у жаҳон тарихида 5 трлн доллардан ошган биринчи компанияга айланди.

Nvidia акциялари сўнгги бир неча йил ичида унинг сунъий интеллект чипларига бўлган юқори талаб туфайли фаол ўсиб бормоқда. Сўнгги ҳафталарда унинг акциялари ўсишига компания томонидан эълон қилинган бир қатор йирик битимлар сабаб бўлди. 28 октябрь куни у Финляндиянинг Nokia компаниясига 1 миллиард доллар сармоя киритишни режалаштираётганини эълон қилди. Аввалроқ у OpenAI’га 100 млрд доллар ва Intel’га 5 млрд доллар сармоя киритиш ниятида эканини маълум қилганди. Ўтган ой давомида Nvidia акциялари 15 фоизга, 2025 йил бошидан эса 55 фоиздан кўпроққа ошди.

Дунёда капиталлашуви энг катта компаниялар қаторига Microsoft ($4,1 трлн) ва Apple ($4 трлн) ҳам киради.

Тайёрлаган: Сардор Юсупов

#акция #капиталлашув #Nvidia