АҚШ «Роснефть»нинг Германиядаги активларини ярим йилга санкциядан чиқарди

Rosneft Deutschland ва RN Refining & Marketing билан операцияларга 2026 йил 29 апрелгача рухсат берилди, деб кўрсатилган АҚШ Молия вазирлигининг лицензиясида. Илгари “Роснефть” АҚШ санкциялар рўйхатига киритилган эди.

Фото: Patrick Pleul/dpa-Zentralbild/picture alliance

АҚШ Молия вазирлиги “Роснефть”нинг Германиядаги шуъба корхоналари билан келаси ярим йил давомида операциялар ўтказишга умумий лицензия берди. 29 октябр куни эълон қилинган ҳужжатда шундай дейилади: “Rosneft Deutschland GmbH ёки RN Refining & Marketing GmbH, ёки улар 50 фоиз ва ундан ортиқ улушга эга бўлган исталган ташкилот иштирокидаги барча транзакцияларга 2026 йил 29 апрел куни соат 00:01гача рухсат этилади”.

Бундан бир кун олдин ФРГ иқтисодиёт вазири Катерина Райхе Германияда ташқи бошқарувда турган “Роснефть” активлари Россия нефт секторига қарши АҚШнинг янги санкциялари таъсирига тушмаслигини айтди. У буни Вашингтон томонидан юборилган “кафолат хати” билан изоҳлади.

Bloomberg ёзганидек, АҚШ “Роснефть”нинг Германиядаги шуъба корхоналарининг мулкдорлик тузилмасини тартибга солиш учун олти ойлик муддат берган. АҚШ президенти Доналд Трамп маъмурияти немис томонига Rosneft Deutschland’га янгиланмайдиган чекланган умумий лицензия бериш имкониятини кўриб чиқаётганини маълум қилган, деб хабар қилди агентлик манбалари.

22 октябр куни АҚШ Украинадаги урушни тугатиш бўйича “Россиянинг жиддий манфаатдор эмаслиги”ни сабаб сифатида келтириб, РФга нисбатан янги санкциялар жорий этди. “Роснефть” ва “Лукойл” каби Россиянинг икки йирик нефт компанияси, шунингдек, уларнинг шуъба корхоналари “қора рўйхат”га киритилди.

Бундан ташқари, “50 фоиз ва ундан ортиқ улуши блокланган шахс(лар)га тегишли ҳар қандай юридик шахслар” ҳам тўлиқ тўсиб қўйилди. Қоидаларни бузган тақдирда “АҚШ фуқаролари ва хорижий фуқароларга нисбатан фуқаровий-ҳуқуқий ёки жиноий санкциялар” қўлланиши мумкинлиги қайд этилган.

Россия Украинага босқин бошлагандан сўнг, Германия ҳокимияти “Роснефть”нинг Rosneft Deutschland ва RN Refining & Marketing устидан назорат қилиш ҳуқуқини бекор қилиб, уларни Федерал тармоқ агентлиги (Bundesnetzagentur)нинг ташқи ишончли бошқарувига ўтказган, бироқ мулк ҳуқуқи “Роснефть”да сақланиб қолган.

Rosneft Deutschland Германия нефтини қайта ишлаш қувватининг тахминан 12 фоизини назорат қилади. Компания мамлакатдаги учта йирик НҚЗда улушга эга: Шведт шаҳридаги PCK Schwedt, Карлсруэдаги MiRo ва Фобург-Дунайдаги Bayernoil.