AI-лойиҳаларни қўллаб-қувватлаш учун қўшимча 100 млн доллар ажратилади

Президентнинг «Сунъий интеллект технологияларига асосланган лойиҳаларни қўллаб-қувватлашга оид қўшимча чора-тадбирлар тўғрисида»ги қарори қабул қилинди. Ҳужжатнинг асосий мақсади — AI ечимларини ижтимоий соҳа ва иқтисодиёт тармоқларига тезкор жорий этиш, стартап экотизимини рағбатлантириш ва венчур молиялаштиришни кенгайтириш.

Қарорга биноан, Тикланиш ва тараққиёт жамғармасидан 2026–2027 йилларда қўшимча 100 млн доллар ажратилади. Шундан:

• 50 млн доллар — давлат органлари ва ташкилотлари фаолиятига AI технологияларини жорий этиш учун беғараз асосда;
• 50 млн доллар — тенг улушларда «Фондлар фонди» ва «IT Park Ventures» венчур жамғармалари устав капиталига жамғарманинг улуши сифатида киритилиб, AI-лойиҳаларни қўллаб-қувватлашга йўналтирилади.

Ажратиладиган маблағлар «Рақамли Ўзбекистон — 2030» стратегиясини амалга ошириш бўйича мувофиқлаштириш комиссияси томонидан тақсимлаш тартибида бошқарилади.