Volkswagen’нинг бир чоракдаги зарари 1 миллиард евродан ошди

Volkswagen’даги иқтисодий йўқотишларнинг асосий сабаблари сифатида АҚШ божлари ва Porsche шуъба компаниясидаги муаммолар тилга олинмоқда. Концерн коронавирус пандемиясидан кейин илк бор чораклик зарар қайд этди.

Фото: picture alliance

Коронавирус пандемияси келтириб чиқарган инқироздан кейин илк марта Volkswagen (VW) чораклик зарарга учради. Компания 2025 йилнинг учинчи чораги (июл–сентябр) учун соф зарар 1,07 миллиард еврони ташкил этганини 30 октябр куни Волфсбургда эълон қилди.

Концерн молия директори Арно Антлиц бу натижанинг асосий сабаблари сифатида божхона божларининг оширилиши ва спорткар ишлаб чиқарувчи Porsche шуъба компаниясидаги муаммоларни келтирди. Яқинда Porsche электромобиллар ишлаб чиқариш стратегиясини қайта кўриб чиқишга мажбур бўлди, уларга талаб пастлиги туфайли Volkswagen сентябр ойида 2025 йил учун иқтисодий прогнозларини кескин пасайтирган эди.

Антлицнинг таъкидлашича, ушбу салбий омиллар бўлмаганида VW’нинг операцион рентабеллиги 5,4 фоизни ташкил этар эди. Унинг сўзларига кўра, «бундай кўрсаткич ҳозирги иқтисодий шароитда муносиб ҳисобланади».

Volkswagen маълумотларига қараганда, АҚШ президенти Доналд Трампнинг тариф сиёсатидан компания йилига тахминан 5 миллиард евро йўқотмоқда. ЕИ ва АҚШ ўртасидаги сўнгги савдо келишувига кўра, Европадан экспорт қилинадиган автомобилларга эндиликда 15 фоизлик бож қўлланмоқда, савдо урушигача бу 2,5 фоизни ташкил этар эди.

Волфсбург концерни охирги бор чораклик зарарни 2020 йилнинг иккинчи чорагида қайд этган эди.

Тайёрлаган: Отабек Матназаров

#Volkswagen #Porsche