Чилонзор туманида тез овқат тайёрлаш шохобчасида ёнғин содир бўлди

Бугун, 4 ноябр куни соат 01:26 да Чилонзор тумани Қатортол кўчасида жойлашган тез овқат тайёрлаш шохобчаси биносида ёнғин юз берди. Ёнғин-қутқарув хизмати ҳодисани қисқа фурсатда бартараф этди, жабрланиш ҳолатлари қайд этилмади.

Фото: Ижтимоий тармоқлар

Тошкент шаҳар Фавқулодда вазиятлар бошқармаси маълумотига кўра, хабар соат 01:26 да қабул қилинган. Ёнғин-қутқарув экипажи соат 01:34 да воқеа жойига етиб келган.

Қутқарувчилар ҳаракатлари натижасида ёнғин соат 01:45 да қуршаб олинган ва соат 01:48 да тўлиқ ўчирилган. Ҳодиса оқибатида тан жароҳати олганлар йўқ.

Ёнғиннинг келиб чиқиш сабаби ва етказилган моддий зарар миқдорини аниқлаш бўйича текширув ишлари олиб борилмоқда.