Мерц: Сурияликлар учун бошпана бериш асослари йўқолди

Суриядан келган қочқинлар Германияни тарк этиб, ватанига қайтиши керак, чунки у ерда фуқаролик уруши якунланди, деди 3 ноябр куни ГФР канцлери Фридрих Мерц. «Сурияда фуқаролик уруши тугади. Энди Германияда бошпана бериш учун асослар йўқ, шунинг учун депортацияни бошлашимиз мумкин», — деди Мерц Шлезвиг-Голштейн ери бош вазири Даниэл Гюнтер билан қўшма матбуот анжуманида.

У, шунингдек, қочқинларнинг кўпчилиги «ихтиёрий тарзда мамлакатга қайтиб, уни тиклашда иштирок этиши»га умид билдирди, акс ҳолда бу ишнинг иложи йўқлигини қайд этди. «Германияда қолган ҳолда қайтишдан бош тортганлар эса, албатта, келгусида мамлакатдан чиқарилиши мумкин», — деди Мерц.

Бундан ташқари, ГФР канцлери бошпана бериш тартиб-таомилларини меҳнат муҳожирларини қабул қилиш жараёнларидан ажратиш зарурлигини таъкидлади. «Мен жуда норозиманки, бизда ҳали ҳам меҳнат бозорига интеграция қилиб бўлган ёки қисман қила олган одамлар бор, аммо улар ҳали ҳам бошпана олиш жараёнида. Келгусида бу тартибни маъмурий жиҳатдан такомиллаштиришни, бошпана бериш ва меҳнат бозорига интеграция жараёнларини тўлиқ ажратишни таклиф қиламиз — айнан шу учун Work-And-Stay номли агентлик мавжуд. Таржимада бу «ҳа, ишла ва қол» дегани», — деди у.

Германия ички ишлар вазири Александр Добриндт маълумотича, 2025 йил октябр ойида Германияда бошпана сўраб берилган дастлабки аризалар сони 8823 тани ташкил этди — бу 2024 йилнинг шу ойига (19 785) нисбатан тахминан 55 фоизга кам.

У бундан олдин Германиядан депортация жараёнларини тезлаштириш режалари ҳақида гапирган эди. Добриндт «Афғонистон ҳокимияти билан тегишли келишувларга эришиш учун қўлидан келган барча ишни қилишини» ва «шунга ўхшаш ишларни Сурия билан ҳам уриниб кўришини» таъкидлаган. Унга кўра, Сурияга фақат жиноятчилар эмас, балки бошпана сўрови рад этилган шахслар ҳам юборилиши режалаштирилган.

Афғонистонда эса 2021 йили «Толибон» ҳаракати ҳокимиятга қайтганидан сўнг Германия икки марта афғонларни чиқариб юборган: 2024 йил август ойида 28 киши ва 2025 йил июл ойида 81 киши. Расмийлар маълумотига кўра, уларнинг барчаси — суд ҳукми билан озодликдан маҳрум этилган жиноятчилар.