Сеул: КХДР Россияга яна 5 минг ҳарбий юборди

Жанубий Корея парламентининг разведка маълумотларига таянган хабарига кўра, минглаб шимолий кореялик ҳарбийлар инфратузилмани тиклаш бўйича қурилиш ишларида иштирок этиш учун РФга юборилган.

Фото: Reuters

Беш минг шимолий кореялик ҳарбий «инфратузилмани тиклаш» ишларида қатнашиш учун Россияга юборилган. Бу ҳақда 4 ноябр куни Жанубий Кореянинг «Ёнҳап» агентлиги парламентнинг разведка бўйича қўмитасига таяниб хабар берди.

«Тахминан 5000 нафар шимолий кореялик ҳарбий-қурувчилар сентябрдан бери босқичма-босқич Россияга жўнатилмоқда ва улар инфратузилмани тиклашга жалб этилиши кутилмоқда», — деди депутат Ли Сон-гвон.

Унинг сўзларига кўра, Сеул РФга кейинги навбатда ҳарбийлар юборишга тайёргарлик доирасида «хизматчиларни ўқитиш ва танлаб олишнинг белгилари»ни ҳам қайд этмоқда.

Жанубий Корея разведкаси маълумотларига кўра, ҳозирда Россия–Украина чегараси яқинида тахминан 10 минг шимолий кореялик ҳарбий бор, яна тақрибан 1000 нафар сапёр минадан тозалаш ишлари билан шуғулланмоқда. Депутат қўшимча қилишича, КХДРнинг камида 600 нафар ҳарбийси Россиянинг Украинадаги уруши давомида ҳалок бўлган.

Бундан аввал Жанубий Кореянинг Миллий разведка хизмати (NIS) КХДР Россияга юборган, урушда иштирок этган ҳарбийлардан тахминан 2000 нафари ҳалок бўлган, деган баҳони келтирган эди.

2024 йил октябридан бери Шимолий Корея Россияга ҳарбий хизматчилардан ташқари қурол-яроғ — жумладан артиллерия снарядлари, ракеталар ва узоқ масофали ракета тизимларини ҳам юборгани ҳақида AFP агентлиги аниқлик киритган.

Тайёрлаган: Отабек Матназаров

#Россия #КХДР