Киев АҚШ билан Tomahawk ракеталари бўйича “ижобий” музокаралар олиб бормоқда

АҚШ президенти Дональд Трамп бундай ракеталарни Киевга юбориш нияти йўқлигини билдирганига қарамай, Украина Tomahawk ва бошқа узоқ масофали қуролларни харид қилиш бўйича “ижобий” музокаралар олиб бормоқда. Бу ҳақда 6 ноябр куни Украина элчиси Олга Стефанишина Bloomberg TV’га берган интервюсида маълум қилди.

“Музокаралар ҳамон давом этяпти, бизда АҚШдан кўпроқ ҳарбий техника сотиб олиш учун мавжуд молиявий ресурсларни кўпайтиришга интилувчи бир қатор делегациялар ишлаяпти”, — деди Стефанишина Balance of Power дастури эфирида.

Унинг қайд этишича, гап фақат Tomahawk ҳақида эмас, балки “турли даражадаги — ҳам узоқ, ҳам қисқа масофали бошқа турдаги ракеталар ҳақида ҳам бормоқда”. “Айта оладиганим шуки, музокаралар жуда ижобий ўтяпти”, — дея қўшимча қилди у.

Аввал Европа ва евроатлантик интеграция масалалари билан шуғулланган Стефанишина Вашингтонга элчи этиб икки ойдан бироз аввал тайинланган. Унинг асосий вазифаларидан бири — АҚШ президенти Доналд Трамп билан муносабатлардаги тарангликни юмшатиш бўлди. Трамп Украина президенти Володимир Зеленскийни бир неча бор танқид қилган ва бир пайтлар уни “диктатор” деб атаган.

Зеленский 2025 йил бошида Овал офисдаги омадсиз учрашувдан сўнг муносабатларни яхшилай олди — ўшанда Трамп ва вице-президент Жей Ди Вэнс уни кескин танқид қилган эди. Октябрда эса АҚШ президенти Москвага нисбатан норозилик ортиб бораётганини кўрсатиб, “Роснефть” ва “Лукойл”га санкциялар жорий қилди ва Росcияни “тинчлик жараёнига жиддий қизиқиш билдирмаётганлик”да айблади.

Bloomberg таъкидлашича, Киевнинг янги устувор йўналиши — Tomahawk ва бошқа узоқ масофали тизимларни қўлга киритиш бўлиб, улар Россия ҳудудидаги нишонларга зарба йўллаш имконини бериши мумкин. Бироқ Трамп Tomahawk фақат АҚШ ҳарбийлари қўллаганда самарали бўлишини, Вашингтон эса уларни жалб қилмоқчи эмаслигини айтган.

Россиянинг Украина энергетика инфратузилмасига қаратилган ҳужумлари давом этаётгани ҳақидаги саволга жавоб бериб, Стефанишина буни “Украина учун жуда оғир давр” деб атади.

“Биз Украина ҳаво мудофаа тизимларини кучайтириш устида қатъий ишлаяпмиз, — деди у. — Бу қишни ҳам, кейинги қишни ҳам бошдан кечиришга қодирмиз, аммо бу шундай давом этиши керак дегани эмас”. Унинг айтишича, Россияга нисбатан ҳар қандай ҳаракатсизлик “унинг имкониятларини янада кенгайтириш учун ‘яшил чироқ’ сифатида қабул қилинади”.