Сийярто: АҚШ Венгрияга Россия нефти бўйича истисно берди

АҚШ президенти Доналд Трамп Венгрияга Россия нефтини харид қилишга қўйилган АҚШ санкцияларидан истисно берганини 7 ноябр куни кечқурун Венгрия ташқи ишлар вазири Петер Сийярто маълум қилди.

“Қўшма Штатлар Венгрияга нефт ва газ бўйича санкциялардан тўлиқ ва муддатсиз истисно берди. Бу қарор учун миннатдормиз — у мамлакатимиз энергетик хавфсизлигини кафолатлайди”, — деб ёзди Сийярто X микроблогида Трамп ва Венгрия бош вазири Виктор Орбаннинг Оқ уйдаги учрашуви якунлангач.

Шу билан бирга, Оқ уйнинг исми ошкор этилмаган вакили AFP агентлигига истисно фақат бир йил давомида амал қилишини маълум қилди.

Бундан аввал Трамп Венгрияни Россия нефтини сотиб олиш бўйича санкция шартларидан озод этишга тайёр эканини айтган эди. “Бу масалани кўриб чиқяпмиз, чунки Венгрияга бошқа ҳудудлардан нефт ва газ олиш жуда қийин”, — деди у 7 ноябр куни журналистларга Орбан билан учрашув пайти. “Биласиз, уларнинг денгизга чиқиш йўли йўқ”, — дея ўз фикрини изоҳлади у.

Шу билан баробар, Оқ уй раҳбари денгизга чиқиш йўли бор ЕИ мамлакатларини Россиядан ҳануз энергия манбалари сотиб олаётганликда айблади. “Бу мени жиддий хавотирга солади: биз уларга ёрдам берамиз, улар эса бориб Россиядан нефт ва газ харид қилади”, — деди у. Брюссел эса бу даъволарга қўшилмади: Россиянинг Украинага ҳужумидан кейин ЕИ Россия нефтини импорт қилишни тақиқлади. ЕК маълумотича, ЕИга Россия нефти импорти улуши 2021 йилнинг 1-чорагидаги 29 фоиздан 2025 йил 2-чорагида 2 фоизгача тушган.

Виктор Орбан Вашингтонда Россия энергия ресурслари мамлакат учун муҳим аҳамиятга эга эканини таъкидлади. У АҚШ президентига “Россиядан нефт ва газ келмай қолса, венгер халқи ва иқтисодиёти учун оқибатлар қандай бўлишини” тушунтиришга тайёрлигини билдирди. “Чунки у бизга қувурлар орқали етказиб берилади. Қувур — идеологик ёки сиёсий масала эмас. Бу физик реаллик, чунки бизда порт йўқ”, — деди Орбан.

Учрашувда Трамп Орбанни “катта раҳбар” деб мақтаб, бошқа европаликларни “Венгрияни кўпроқ ҳурмат қилиш”га чақирди ва Орбаннинг миграция масаласида “тўғри” бўлганини таъкидлади. Орбан эса мамлакатда “нол миграция” қоидаси борлигини қайд этди.

22 октябр куни АҚШ “Роснефть” ва “Лукойл”га санкциялар жорий этган, бунга “Россиянинг Украинада тинчлик жараёнига жиддий қизиқиш кўрсатмаётгани” сабаб қилиб келтирилган эди. Бир неча кун ўтгач, Трамп Виктор Орбаннинг шахсий илтимосига қарамай, Будапешт учун истисно қилишдан бош тортгани ҳақида хабар берилганди.