Трамп ЖАРдаги G20 саммитига бойкот билан таҳдид қилмоқда

АҚШ президенти Доналд Трамп 22–23 ноябр куни Йоханнесбургда ўтадиган G20 (“Катта йигирматалик”) саммитига мезбонлик қиладиган Жанубий Африка Республикаси (ЖАР)га бойкот билан таҳдид қилди. 8 ноябрга ўтар кечаси у ўзининг Truth Social ижтимоий тармоғидаги навбатдаги хабарида бу мамлакатни оқ танли деҳқонларни ўлдириш ва уларнинг ерларини ноқонуний тортиб олишда яна айблади.

«Ушбу инсон ҳуқуқлари бузилиши давом этар экан, АҚШ ҳукуматининг бирор вакили ҳам саммитда иштирок этмайди», — деб ёзди Трамп ўз даъволарига далил келтирмасдан. Шу билан бирга у 2025 йилги анъанавий G20 тадбирини ўтказиш жойи сифатида ЖАРни танлашни «шармандалик» деб атади.

Трамп 5 сентябр куни “Катта йигирматалик”нинг ноябр ойида ЖАРдаги саммитида иштирок этмаслигини айтган эди. Оқ уй раҳбари ўрнига саммитга АҚШ вице-президенти Жей Ди Вэнс боради, деб кутилган. Бироқ Трампнинг янги баёнотидан Вэнснинг Йоханнесбургга сафари ҳам бекор қилиниши англашилади.

21 май куни ЖАР президенти Сирил Рамафоса Оқ уйга ташриф буюрганида, Доналд Трамп Жанубий Африка Республикасида гўё оммавий равишда оқ танли деҳқонлар ўлдирилаётганини айтди. Далил сифатида у бир неча суратни кўрсатди. Reuters’нинг кейинроқ хабар беришича, ушбу расмлардан бири Конго Демократик Республикаси (КДР)нинг Гома шаҳрида исёнчилар билан тўқнашувлардан сўнг қутқарувчилар жасад қопларини кўтараётган манзарани акс эттирган.

Овал кабинетдаги учрашув чоғида Рамафоса кам сонли оқ танли аҳолига нисбатан «геноцид» айбловларини кескин рад этди.

Трамп оммавий қотилликка яна бир «далил» сифатида қишлоқ йўли бўйлаб қатор қўйилган юзлаб оқ хочлар акс этган кадрларни келтирди. Оқ уй раҳбари уларни гўё мингга яқин ўлдирилган оқ деҳқонларнинг қабрлари деб таъкидлади. Аслида эса, KNA агентлиги маълумотига кўра, бу тасвирлар 2020 йили ЖАРнинг шарқий қисмдаги норозилик акциясига оид эди.

Доналд Трампнинг сўзларига кўра, 2026 йилги G20 саммити декабр ойида унинг Майамига яқин Дорал шаҳрида жойлашган голф-клуби ва меҳмонхона-мажмуасида бўлиб ўтади. «Ҳа, у Доралда ўтади. Ҳамма айнан ўша ерда бўлишни истайди, чунки курорт аэропортнинг ёнида, бу энг яхши жой, у ажойиб», — деди президент сентябр бошида.

Республикачининг таъкидлашича, у учрашувни ташкил этишдан пул топмайди. «Бу пул ҳақидаги келишув эмас», — деди у. Трамп, шунингдек, АҚШдаги саммитда Россия президенти Владимир Путин ва Хитой раиси Си Жинпингни мамнуният билан қабул қилишини қўшимча қилди.

Washington Post (WP) эслатганидек, Трамп ўзининг биринчи президентлик муддатида ҳам «Катта еттилик» (G7) саммитини шахсий голф-клубида ўтказишни режалаштирган, бу эса кўп томонлама танқидларга сабаб бўлган эди.