BBC бош директори Трампнинг нутқи сохталаштирилгани туфайли истеъфога чиқди

Аввалроқ The Telegraph собиқ журналист Майкл Прескотт томонидан ёзилган ва Би-би-си директорлар кенгашига йўлланган меморандумни чоп этганди. Прескоттнинг таъкидлашича, телекомпания Трампнинг 2021 йил 6 январда Капитолийга ҳужум олдидан сўзлаган нутқини сохталаштирган.

Би-би-си бош директори Тим Дэви ва News бош директори Дебора Тернесс истеъфога чиқди, деб хабар берди Daily Mail.

Бу АҚШ президенти Доналд Трампнинг нутқини сохталаштириб, томошабинларни чалғитган BBC Panorama ҳужжатли филмига нисбатан танқидлар ортидан юз берди.

Меморандумда айтилишича, эфирда ўша кунги воқеалар хронологияси бузиб кўрсатилган ва президентнинг нутқи мазмуни ҳақида ёлғон таассурот ҳосил қилинган.

BBC бош директори Тим Дэви
Фото: Getty Images

Шундан сўнг АҚШ президентининг матбуот котиби Кэролайн Левитт The Telegraph нашрига берган интервюсида Би-би-сини «сўл тарғибот машинаси» ва «сохта ОАВ» деб атади.

2021 йил 6 январ куни, Трамп сайловларда мағлуб бўлганидан икки ой ўтгач, унинг тарафдорлари Капитолий биносига бостириб киришганди. Бу ерда сайловларда Жо Байден ғалаба қозонганини тасдиқлаш учун конгресс йиғилиши ўтказилиши керак эди. Ўшанда тўқнашувлар оқибатида беш киши ҳалок бўлди,140 нафар полициячи жароҳатланди.

Ушбу воқеадан сўнг Трампга қарши бир нечта жиноят ишлари очилди ва у президентликка сайланганидан сўнг бу ишлар ёпилди.

Тайёрлаган: Дилшодбек Асқаров

#BBC #Доналд Трамп #Тим Дэви