Давлат департаменти: Ўзбекистон АҚШдан кичик АЭС реакторлари сотиб олади

АҚШ Давлат департаменти Ўзбекистон президентининг 6 ноябр куни Вашингтонга ташрифи доирасида эришилган келишувлар ҳақида маълумот берди.

Ерости қазилмалар

Маълум қилинишича, Ўзбекистонда АҚШ компаниялари билан биргаликда аниқланган фойдали қазилмалар конларини ўзлаштириш ҳуқуқи биринчи навбатда АҚШ компанияларига таклиф этилади.

Томонлар биргаликда муҳим минераллар ва нодир маъданлар соҳасида 400 млн долларгача бўлган қийматдаги лойиҳаларни амалга оширади.

Энергетика

Давлат департаментига кўра, Ўзбекистон АҚШ энергетика компанияларидан кичик модулли ядро реакторларини сотиб олишини билдирган.

Авиация

Ўзбекистон умумий қиймати 8,5 млрд доллар бўлган 22 та Boeing 787 Dreamliner самолётларини харид қилади.

Қишлоқ хўжалиги

Ўзбекистон кейинги 3 йил давомида АҚШдан 2 млрд долларгача қийматдаги қишлоқ хўжалиги техникалари, шунингдек, 2 млн тоннагача соя дуккаклари ва 100 минг долларлик пахта импорт қилади.

Автосаноат

Кейинги 3 йил давомида АҚШдан 5 млрд долларлик автомобил бутловчи қисмлари импорт қилиниши ҳам кутилмоқда.

Шунингдек, General Motors билан ҳамкорликни кенгайтириш, АҚШ томонининг UzAuto Motors'ни хусусийлаштиришда иштирок этиши имкониятлари кўриб чиқилади. UzAuto Motors'даги қарийб 100 фоизлик давлат улушини сотиш учун оммавий савдо 2026 йил 1-чоракка белгиланган.

Кимё саноати

Air Products компанияси Ўзбекистонда метанол ишлаб чиқаришни йўлга қўйиш учун 3 млрд долларгача инвестиция киритади.

Метанолдан олефин, кўмирдан кимёвий маҳсулотлар олишга қаратилган маҳаллий корхоналарни ташкил этишда Америка технологиялари жалб этилади.

Бошқа масалалар

Ўзбекистон 2026 йилдан бошлаб АҚШ фуқаролари учун 30 кунлик визасиз режим жорий этади.

Ўзбекистон ва АҚШ ҳуқуқ-тартибот идоралари халқаро жиноий ташкилотлар аъзоларини ҳибсга олиш, таъқиб қилиш ва ҳукм қилишга оид ахборотларни алмашади.

Ўзбекистон гиёҳвандлик воситалари айланмасига қарши курашиш бўйича минтақавий ташкилотлар фаолиятини кучайтиришни режа қилган.

Ўзбекистон, шунингдек, ўз кучишлатар тизимлари ва мудофаа эҳтиёжлари учун АҚШ техникаларини сотиб олиш учун ўз имкониятларини сафарбар этади.