Трамп сайловларга таъсир ўтказишга уринишда гумонланган 77 кишини афв этди

АҚШ президенти Доналд Трамп ўзининг 2020 йилги президентлик сайловлари натижаларига таъсир ўтказишга уринишда гумон қилинган деярли 80 нафар тарафдорини афв этди. 10 ноябрга ўтар кечаси АҚШ Адлия вазирлиги ҳузуридаги афв масалалари бўйича прокурор Эдвард Мартин афв этилганлар рўйхатини эълон қилди. Рўйхатга Трампнинг собиқ адвокати ва Ню-Йорк шаҳри собиқ мэри Руди Жулиани ҳамда яна 76 киши киритилган.

«Ушбу фармон 2020 йилги президентлик сайловларидан кейин Америка халқига нисбатан содир этилган миллий ноқонунийликни тузатади», — деди Мартин. Унга кўра, афв «миллий яраштириш» жараёнини давом эттиради.

Бундан ташқари, рўйхатга Оқ уй маъмуриятининг собиқ раҳбари Марк Медоуз ва Трампнинг мағлубиятини расман тасдиқланишини олдини олиш бўйича стратегиялар таклиф этган Жон Истман ҳам киритилган. Шунингдек, Трампнинг аввалги маслаҳатчиси Борис Эпштейн ва консерватив юрист Сидни Пауэлл ҳам афв этилганлар орасида. Рўйхатда ўнлаб республикачи фаоллар бор.

Ҳужжатда афв «тўлиқ, мутлақ ва шартсиз» экани қайд этилган. Трампнинг ўзи рўйхатга киритилмаган. У афв ҳужжатини аниқ қачон имзолагани очиқланмаган.

AFP таъкидлашича, мазкур афв кўпроқ рамзий характерга эга. Рўйхатга киритилганлардан ҳеч бири федерал даражада — президент афви татбиқ этиладиган даражада — жиноят содир этганликда айбланмаган, аммо бундай қарор уларга нисбатан келгусида жиноят иши қўзғатиш имкониятини истисно қилади. Шу билан бирга, улар штатлар даражасидаги қонунларга мувофиқ жавобгарликка тортилиши мумкин.