Украинада Зеленскийнинг сафдоши Тимур Миндич уйида тинтув ўтказилди

Украина Миллий антикоррупция бюроси (НАБУ) 10 ноябр куни тонгда Киевда президент Володимир Зеленскийнинг кўп йиллик сафдоши, бизнесмен ва «Квартал 95» студиясининг мулкдори Тимур Миндич уйида тинтув ўтказди, деб хабар берди «Украинская правда» ҳуқуқни муҳофаза қилиш органларидаги манбаларга таяниб. Журналистлар маълумотича, тинтув бошланишидан бир неча соат олдин Миндич мамлакатдан чиқиб кетган.

Фото: ANDRII NESTERENKO | AFP / SCANPIX Читать далее: https://www.delfi.lt

НАБУ Украина Ихтисослаштирилган антикоррупция прокуратураси (САП) билан биргаликда «энергетика соҳасида коррупцияни фош этиш бўйича кўламли операция» ўтказилганини тасдиқлади, бироқ айнан кимларда тинтув бўлганини аниқлаштирмади. Идоранинг Telegram-каналида: «15 ойлик иш ва 1000 соатлик аудиёзув. Юқори даражадаги жиноий ташкилот фаолияти ҳужжатлаштирилди», — дейилади.

«Жиноий ташкилот фаолиятининг асосий йўналиши “Энергоатом” контрагентларидан шартномалар қийматининг 10–15 фоизи миқдорида тизимли равишда ноқонуний фойда олиш эди. Хусусан, “Энергоатом” контрагентларига кўрсатилган хизматлар/етказиб берилган маҳсулот учун тўловларни блоклашдан қочиш ёки етказиб берувчи мақомидан маҳрум қилмаслик учун “откат” тўлаш шартлари бўлган», — деб ёзди НАБУ. Идорага кўра, «йилига 200 млрд гривнадан ортиқ даромадга эга бўлган стратегик корхона бошқаруви» расмий мансабдорлар томонидан эмас, балки «формал ваколатларсиз» шахслар — «кузатувчи» ролини олганлар томонидан амалга оширилган.

НАБУнинг YouTube-каналидаги ролик тасвири тавсифида жиноий ташкилот таркибига «энергетика соҳасининг амалдаги ва собиқ мансабдор шахслари, машҳур бизнесмен ва бошқа шахслар» киргани қайд этилган.

Шу куни Украина адлия вазири ва собиқ энергетика вазири Герман Галушченконинг уйида, шунингдек, «Энергоатом»да тинтувлар ўтказилгани ҳақида Олий Рада депутати Ярослав Железняк хабар қилди. «Украинская правда» бу маълумoтни «бир-биридан мустақил икки манба» тасдиқлаганини ёзди.

«Украинская правда» расмий изоҳ сўраб НАБУ ва САПга мурожаат қилди. Журналистлар хабарига кўра, САП тергов ҳаракатларини изоҳлашдан бош тортди.