Сербия президенти: Европанинг РФ билан уруши тобора яққол бўлиб боряпти

Сербия президенти Александр Вучич 11 ноябр куни Pink телеканалига берган интервюсида, Франция Қуролли кучлари Бош штаби бошлиғи Фабен Мандоннинг яқиндаги баёноти ҳақидаги саволга жавоб берар экан, Европадаги давлатлар Россия билан эҳтимолий урушга тайёрланаётганини айтди. «Фактларни таҳлил қилар эканман, Европа билан Россия ўртасидаги уруш тобора яққоллашиб бораётгани ҳақидаги хулосага келяпман. Бу шунчаки гап эмас. Ҳамма шунга тайёргарлик кўрмоқда. Буни жуда масъулиятли генерал айтди», — деди Вучич.

Воқеалар ривожи фонида Сербия «икки ўт орасида» қолган, шу боис у «бироз четда туриши» керак, деб ҳисоблайди серб етакчиси. «Бошқа томондан, армиямизни мустаҳкамлашни давом эттиришимиз шарт. Қуролланяпмиз. Мамлакатимиз ҳимоясига катта маблағ сарфлашни давом эттириш керак», — деб қўшимча қилди у.

1 сентябрдан буён Франция Бош штабига раҳбарлик қилаётган Фабен Мандон 22 октябр куни «Қуролли кучларга қўйган биринчи вазифам — уч-тўрт йил ичида тўқнашувга тайёр бўлиш», деб баёнот берди. «Россия — бу қитъамизда урушни давом эттириш васвасасига берилиши мумкин бўлган мамлакат, бу менинг тайёргарлигимда ҳал қилувчи омил», — дея келтирган унинг сўзларини Le Monde газетаси.

Москва «Европанинг жамоавий заифлиги тўғрисида тасаввур ҳосил қилмоқда», деди Мандон. Шу билан бирга, у Россиянинг «куч қўллашда эркин» эканини таъкидлади. Бироқ европаликлар РФдан «иқтисодий, демографик ва саноат нуқтаи назаридан устун», шу боис «ишончли бўлиш учун барча асослар мавжуд», деди у.

Аввалроқ Франция қуролли кучлари вазири Катрин Вотрен мамлакатнинг 2026 йил учун мудофаа бюджети 57,1 млрд еврогача оширилишини айтган эди — бу ялпи ички маҳсулотнинг 2,2 фоизига тенг ва 2025 йил учун режалаштирилган маблағдан 13 фоизга кўп.