Россиянинг Киев бўйлаб навбатдаги ёпирилма зарбаси – фотосуратлар

Россия қўшини 14 ноябрга ўтар кечаси Киевга «Кинжал», «Циркон», «Калибр», «Искандер-М» ракеталари, зарбдор дронлар ҳамда имитатор дронлардан фойдаланган ҳолда ҳужум уюштирган. Украина президенти Володимир Зеленский РФ қўшини зарба учун 430 га яқин дрон ва 18 ракетани, жумладан, баллистик ракеталарни ишга солганини маълум қилган.

Шаҳарнинг барча районларида вайронгарчиликлар қайд этилган. Деснянск, Оболон, Соломенск, Днипровск, Святошинск ва Подолск районларида турар жой бинолари шикастланган. Шаҳарнинг Дарницкий районида мактаб ҳудудида ёнғин содир бўлган, Голосеев районида дрон парчалари шифохона ҳудудига қулаб тушган. Шевченково районида очиқ майдонда ёнғин содир бўлган.

36 киши жароҳатланди, олти киши ҳалок бўлди, дея хабар берган Киев шаҳри мэри Виталий Кличко.

Россия ҳужуми туфайли Киевда иссиқлик тармоқларининг бир қисми шикастланган. Деснянск районида иссиқлик магистралидаги фавқулодда вазият туфайли биноларнинг бир қисмида иссиқлик таъминоти вақтинча узилган, деб ёзди Виталий Кличко ўз телеграм-каналида. Унинг айтишича, Подолск районида ҳам иссиқлик таъминотида узилишлар бор.

Володимир Зеленский Россия зарбаси «одамлар ва фуқаролик инфратузилмасига имкон қадар кўпроқ зарар етказиш» учун режалаштирилганини таъкидлаган.

«Украина бу зарбаларга узоқ масофали куч билан жавоб қайтариши, дунё эса уларни санкциялар билан тўхтатиши керак», – деди Украина президенти. «Россия ҳали ҳам нефт сотиш ва ўз схемаларини қуриш имконига эга. Буларнинг барчасини тўхтатиш керак», – дея қўшимча қилган у.

Украина президенти Киевга ҳужум қилган «Искандер» ракеталаридан бирининг парчалари Озарбойжон элчихонаси биносига зарар етказганини айтган. Россиянинг Озарбойжондаги элчиси Михаил Евдокимов Озарбойжон Ташқи ишлар вазирлигига чақиртирилди ва унга нота топширилди, деб хабар берди Озарбойжондаги Minval нашри. Кейинроқ Зеленский телеграм-каналида Озарбойжон президенти Илҳом Алиев билан суҳбатлашгани ҳақида ёзди. Зеленскийнинг сўзларига кўра, Алиев «бу зарбани қоралаган ва бу россияликлар ҳам элчихона биносини, ҳам Озарбойжон билан боғлиқ бошқа объектларни нишонга олиши билан боғлиқ биринчи ҳолат эмаслиги таъкидлаган».